SPPUविद्यापीठाच्या भरती प्रक्रियेत अपात्र ठरणाऱ्या तब्बल 6 हजार उमेदवारांना मोठी संधी;अर्जात दुरूस्ती कारता येणार

ऑनलाईन पध्दतीने अर्जामध्ये बदल/सुधारणा केलेल्या उमेदवारांना सुधारित अर्जाची प्रत तसेच ATR व API ची प्रत संबधित आवश्यक त्या कागदपत्रांसह विद्यापीठ कार्यालयात स्वाक्षरीसह प्रशासन शिक्षक कक्षाकडे सादर करण्यासाठी येत्या ९ मे २०२६ सायंकाळी ६.०० वाजेपर्यंत अंतिम मुदत देण्यात आली आहे.

Apr 27, 2026 - 21:48 Updated: Apr 27, 2026 - 21:52

SPPUविद्यापीठाच्या भरती प्रक्रियेत अपात्र ठरणाऱ्या तब्बल 6 हजार उमेदवारांना मोठी संधी;अर्जात दुरूस्ती कारता येणार

SPPU campus building representing the latest recruitment update where 6000 disqualified candidates have received another opportunity.

एज्युवार्ता न्यूज नेटवर्क

सावित्रीबाई फुले पुणे विद्यापीठातील विविध विभागातील प्राध्यापकांच्या रिक्त जागांसाठी ऑनलाईन पद्धतीने अर्ज केलेल्या सुमारे 9 हजारांपैकी तब्बल 6 हजार उमेदवारांनी ऑनलाइन अर्ज सादर करताना एटीआर (ATR) भरला नसल्याची माहिती सर्व प्रथम एज्युवार्ताने प्रसिद्ध केली होती. त्यामुळे हे सर्व उमेदवार भरती प्रक्रियेतून अपात्र होण्याची शक्यता निर्माण झाली होती. त्यावर आता विद्यापीठाने पुन्हा एकदा या उमेदवारांना ATR भरण्यासाठी येत्या 5 मे पर्यंत मुदत दिली आहे. त्याबाबतचे पत्रक विद्यापीठातर्फे प्रसिद्ध करण्यात आले आहे.वाढीव मुदतीमध्ये उमेदवारांना नव्याने अर्ज करता येणार नाहीत.

सावित्रीबाई फुले पुणे विद्यापीठातील विविध शैक्षणिक विभागांमधील शासनमान्य प्राध्यापक, सहयोगी प्राध्यापक, सहायक प्राध्यापक या संवर्गातील रिक्त एकूण १११ शिक्षकी पदांच्या भरतीकरीता जाहिरात १३ सप्टेंबर, २०२४ रोजी विविध वर्तमानपत्रांमध्ये आणि विद्यापीठ संकेतस्थळावर प्रसिध्द करण्यात आलेली होती. तसेच त्याबाबत वेळोवेळी शुध्दीपत्र प्रसिध्द केले होते.

या जाहिरातीनुसार सर्व उमेदवारांनी Academic and Research Credentials (यापूर्वीचा ATR 60 गुण) व लागू असल्यास किमान १२०/७५ गुणांचा Research Score (API) संबंधित आवश्यक त्या कागदपत्रांसह जमा करणे अनिवार्य आहे. परंतू अनेक अर्जदारांनी याची पूर्तता केली नसल्याने त्यांची उमेदवारी रद्द होण्याची शक्यता निर्माण झालेली आहे.त्यामुळे सर्व मूळ अर्जदाराना त्यांच्या अर्जामध्ये ऑनलाईन पध्दतीने बदल/सुधारणा करण्याकरीता अंतिम मुदत देण्यात येत आहे. त्यानुसार त्यांनी ऑनलाईन पध्दतीने त्यांच्या अर्जामध्ये बदल/सुधारणा येत्या २८ एप्रिल ते ५ मे २०२६ या कालावधीत करावेत. तसेच ऑनलाईन पध्दतीने अर्जामध्ये बदल/सुधारणा केलेल्या उमेदवारांना सुधारित अर्जाची प्रत तसेच ATR व API ची प्रत संबधित आवश्यक त्या कागदपत्रांसह विद्यापीठ कार्यालयात स्वाक्षरीसह प्रशासन शिक्षक कक्षाकडे सादर करण्यासाठी येत्या ९ मे २०२६ सायंकाळी ६.०० वाजेपर्यंत अंतिम मुदत देण्यात आली आहे.

सावित्रीबाई फुले पुणे विद्यापीठासह राज्यातील विविध विद्यापीठांमधील प्राध्यापक भरतीची प्रक्रिया सुरू आहे. सावित्रीबाई फुले पुणे विद्यापीठातील 111 जागांसाठी तब्बल 9 हजार उमेदवारांनी अर्ज केले आहेत. परंतु, त्यातील केवळ 3 हजार उमेदवारांनीच एटीआर भरले आहेत. राज्य शासनाच्या उच्च शिक्षण विभागाने प्रसिद्ध केलेल्या अध्यादेशानुसार उमेदवारांच्या 'एटीआर'नुसार उमेदवारांचे गुण नोंदवले जाणार आहेत.त्यानंतर पुढे मुलाखत घेऊन निवड प्रक्रिया पूर्ण केली जाणार आहे.

विद्यापीठाने प्रसिध्द केलेल्या जाहिराती नुसार अर्ज केलेले उमेदवार त्यांच्या अर्जामध्ये बदल किंवा सुधारणा करु शकतात. तसेच सदर वाढीव मुदतीमध्ये उमेदवारांना नव्याने अर्ज करता येणार नाहीत.याबाबतचे सविस्तर शुध्दीपत्रक विद्यापीठाच्या admin.unipune.ac.in/recruitment या संकेतस्थळावर मंगळवारी प्रसिध्द केले जाणार आहे.