अखेर दीड महिन्यानंतर बदलापूर शाळेचे अध्यक्ष, सचिवांना अटक 

एज्युवार्ता न्यूज नेटवर्क 

बदलापूर लैंगिक अत्याचार घटनेमुळे (Badlapur sexual assault incident) संपूर्ण देश हादरला असताना, ज्या शाळेत ही घटना घडली त्या शाळाचे अध्यक्ष आणि सचिव गेल्या दीड महिन्यांपासून पोलीसांना चकवा देत पसार होते. मात्र, ठाणे गुन्हे शाखेच्या युनिट ४ पथकाने संस्थेचे अध्यक्ष उदय कोतवाल आणि सचिव तुषार आपटे (President Uday Kotwal and Secretary Tushar Apte) या दोघांनाही बुधवारी मध्यरा‍त्री कर्जत परिसरातून अटक केली. त्यांचा ताबा राज्य शासनाने स्थापन केलेल्या विशेष तपास पथकाकडे (SIT) दिला जाणार आहे.

गेल्या दीड महिन्यापासून पसार असलेल्या कोतवाल आणि आपटे यांना शोधण्यासाठी ठाणे पोलिसांनी दोन पथक तयार केली होती. हे दोघे कर्जत भागात येणार असल्याची माहिती मिळाल्यानंतर सापळा रचून पोलिसांनी त्यांना ताब्यात घेतले. या दोघांविरुद्ध १६ ऑगस्ट रोजी गुन्हा दाखल करण्यात आला आहे. तेव्हापासून ते गायब होते. त्यानंतर मुंबई हायकोर्टात अटकपुर्व जामिन मिळवा यासाठी केलेला अर्ज न्यायालयाने फेटाळून लावला. 

बदलापूरच्या घटनेतील आरोपी अक्षय शिंदे हा पोलीस एन्काउंन्टरमध्ये ठार झाल्याप्रकरणी चौकशी करण्यास राज्य सरकारने उच्च न्यायालयाचे
निवृत्त न्यायमूर्ती दिलीप भोसले यांच्या अध्यक्षतेखाली एकसदस्यीय आयोग स्थापन केला आहे. आयोग ३ महिन्यात अहवाल सादर करेल. ही चौकशी करणार असलेले न्या. दिलीप भोसले हे अलाहाबाद उच्च न्यायालयाचे निवृत्त मुख्य न्यायमूर्ती आहेत.