SCERT नंतर मुख्याध्यापक संघाचे वार्षिक परीक्षेचे वेळापत्रक प्रसिद्ध; नव्या वादाला तोंड फुटणार?
राज्यातील शाळांच्या परीक्षा मुख्याध्यापक संघाने प्रसिद्ध केलेल्या वेळापत्रकानुसार येत्या ३ एप्रिल पासून सुरु होणार असल्याचे दिसून येत आहे. परिणामी एससीईआरटी आपले वेळापत्रक माघार घेणार का? याबाबत उत्सुकता निर्माण झाली आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य शैक्षणिक संशोधन व प्रशिक्षण परिषदेतर्फे (SCERT) राज्यातील सर्व शाळांसाठी वार्षिक परीक्षा (Annual Examination) व पॅट परीक्षा (PAT exam) घेण्याबाबतचे वेळापत्रक प्रसिद्ध करण्यात आले. त्यानंतर आता महाराष्ट्र राज्य माध्यमिक व उच्च माध्यमिक शाळा मुख्याध्यापक संघ महामंडळाने राज्यातील सर्व शाळांच्या मुख्याध्यापकांना द्वितीय सत्राच्या परीक्षा (Second Semester Exams)म्हणजेच वार्षिक परीक्षा व पॅट परीक्षा केव्हा घ्याव्यात याबाबतचे वेळापत्रक तयार करून पाठविले आहे, त्यामुळे आता मुख्याध्यापक संघ आणि एससीईआरटी (Principals Association and SCERT) उघडपणे आमनेसामने आले आहेत. त्यामुळे त्यामुळे राज्यातील शाळांच्या परीक्षा मुख्याध्यापक संघाने प्रसिद्ध केलेल्या वेळापत्रकानुसार येत्या ३ एप्रिल पासून सुरु होणार असल्याचे दिसून येत आहे. परिणामी एससीईआरटी आपले वेळापत्रक माघार घेणार का? याबाबत उत्सुकता निर्माण झाली आहे.तसेच यामुळे नव्या वादाला तोंड फुटाण्याची शक्यता निर्माण झाली आहे.
राज्यातील शाळांच्या निकालामध्ये व परीक्षांमध्ये एक सूत्र ठेवण्यासाठी SCERT ने वार्षिक परीक्षा व पॅट परीक्षेचे वेळापत्रक प्रसिद्ध केले. मात्र या वेळापत्रकानुसार परीक्षा घेतल्यास विद्यार्थ्यांचा निकाल नियोजित कालावधीत जाहीर करणे अडचणीचे ठरणार असल्याने संबंधित वेळापत्रकाबाबत पुनर्विचार करावा, असे निवेदन मुख्याध्यापक संघातर्फे शिक्षण विभागाला देण्यात आले. परंतु, त्याला सकारात्मक प्रतिसाद मिळाला नाही. शिक्षकांनी ज्या दिवशी परीक्षा होईल त्याच दिवशी विद्यार्थ्यांच्या उत्तर पत्रिका तपासाव्यात आणि निकाल तयार करण्याची प्रक्रिया पूर्ण करावी, अशी भूमिका SCERT च्या वरिष्ठ अधिकाऱ्यांनी घेतली. परंतु, हे शक्य नसल्याने मुख्याध्यापक संघाने 3 एप्रिल पासून 23 एप्रिल पर्यंत वार्षिक परीक्षा व पॅट परीक्षेचे नियोजन केले.
एससीईआरटी ने प्रसिद्ध केलेल्या वेळापत्रकानुसार 25 एप्रिल पर्यंत वार्षिक परीक्षा चालणार होती. परिणामी वार्षिक परीक्षांचे पेपर तपासून होणे शक्य नव्हते. त्यामुळे मुख्याध्यापक संघाने सुरुवातीला वार्षिक परीक्षा घेण्यासंदर्भातील वेळापत्रक तयार केले आहे. त्याचप्रमाणे शिक्षण विभागाने प्रसिद्ध केलेल्या वेळापत्रकानुसार पॅट परीक्षा घेण्याचे निश्चित केले आहे, असे असले तरी मुख्याध्यापक संघ आणि SCRT यांच्यात समन्वय असणे गरजेचे आहे. मात्र स्वतंत्र वेळापत्रक प्रसिद्ध झाल्याने समन्वय नसल्याचे उघड होते. त्यामुळे यावरून शिक्षण विभागात वाद निर्माण होण्याची शक्यता नाकारता येत नाही.
