पुण्यात नामांकित महाविद्यालयातील विद्यार्थिनीवर बलात्कार

एज्युवार्ता न्यूज नेटवर्क 

बदलापूर (Badlapur)येथील विद्यार्थिनीवर झालेली अत्याचाराची घटना ताजी असताना पुणे शहरातील एका नामांकित महाविद्यालयामधील (reputed college in Pune city)विद्यार्थिनीवर चौघांनी बलात्कार (College student raped)केल्याची धक्कादायक माहिती समोर आली आहे. दोन दिवसापूर्वी ही घटना घडलेली असताना ती बाहेर येऊ नये म्हणून अत्यंत गोपीनीयता पाळण्यात आली असल्याचा आरोप रिपब्लिकन विद्यार्थी सेनेतर्फे करण्यात आला आहे. मात्र, या घटनेमुळे शालेय व महाविद्यालयीन विद्यार्थिनी सुरक्षित आहेत का ? असा प्रश्न निर्माण झाला आहे.

महाविद्यालयामध्ये घडलेल्या घटनेमुळे विद्यार्थी व पालकांमध्ये चिंतेचे वातावरण असून या घटनेनंतर महाविद्यालय प्रशासनाने ओळखपत्र असल्याशिवाय विद्यार्थ्यांना महाविद्यालयाच्या आवारात प्रवेश न देण्याची भूमिका घेतली आहे. पोलीस प्रशासनाने आरोपींना अटक करून त्यांना शासन करावे. त्याचप्रमाणे या घटनेस महाविद्यालय व्यवस्थापनाला जबाबदार धरून त्यांच्यावरही कारवाई करावी, अशी मागणीही रिपब्लिकन विद्यार्थी सेनेने कोरेगाव पोलीस स्टेशनकडे निवेदनाद्वारे केली आहे.

रिपब्लिकन विद्यार्थी सेनेचे प्रदेश अध्यक्ष विवेक बनसोडे म्हणाले, शैक्षणिक संस्थांमध्ये मुलींच्या सुरक्षिततेबाबत पुरेशी काळजी घेतली जात नसल्याचे या घटनेमुळे पुन्हा एकदा समोर आले आहे. त्यामुळे यापुढील काळात शाळा व महाविद्यालयाच्या आवारात विद्यार्थी व विद्यार्थिनींच्या पालकांच्या व्यतिरिक्त इतरांना प्रवेश देण्यात येऊ नये, प्रवेशद्वारावर ओळखपत्र तपासूनच विद्यार्थ्यांना प्रवेश देण्यात यावा. त्याचप्रमाणे विद्यार्थिनींच्या सुरक्षिततेसाठी ठोस उपाययोजना केल्या जाव्यात. या मागणीसाठी रिपब्लिकन विद्यार्थी सेनेच्या वतीने आंदोलन केले जाणार आहे. 

---------