एमपीएससी : भरती प्रक्रियेत मराठा (कुणबी) उमेदवारांना मोठा दिलासा
या भरतीअंतर्गत एकूण ६५ पदे भरली जाणार आहेत. त्यासाठी आयोगाच्या संकेतस्थळावर २७ जून पासून ऑनलाइन अर्ज प्रक्रिया सुरू होणार आहे. अर्ज करण्याची अंतिम मुदत ११ जूलै २०२५ पर्यंत असणार आहे.
eduvarta@gmail.com 
एज्युवार्ता न्यूज नेटवर्क
स्पर्धा परीक्षेची तयारी करणाऱ्या विद्यार्थ्यांसाठी महत्त्वाची अपडेट समोर आली आहे. महाराष्ट्र लोकसेवा आयोगामार्फत (Maharashtra Public Service Commission) राज्य शासनाच्या शालेय शिक्षण व क्रिडा विभागातील (School Education and Sports Department) अधिक्षक व तत्सम पदे, सामान्य राज्य सेवा गट- ब या संवर्गातील पदभरती मराठा (कुणबी) उमेदवारांना मोठा दिलासा (Big relief for Kunbi candidates) मिळाला आहे. या भरती प्रक्रियेसाठी मराठा समाजातील कुणबी दाखला मिळालेल्या तरुणांना इतर मागास वर्गाचा दावा करण्याचा विकल्प आयोगाने उपलब्ध करून दिला आहे.
त्याकरिता शुद्धीपत्रक प्रसिद्ध करण्यात आली आहे. या भरतीअंतर्गत एकूण ६५ पदे भरली जाणार आहेत. त्यासाठी आयोगाच्या संकेतस्थळावर २७ जून पासून ऑनलाइन अर्ज प्रक्रिया सुरू होणार आहे. अर्ज करण्याची अंतिम मुदत ११ जूलै २०२५ पर्यंत असणार आहे. शासन निर्णय २८ मे, २०२४ नुसार, अराखीव किंवा आर्थिक दृष्ट्या दुर्बल घटक (EWS) प्रवर्गातून अर्ज सादर करणाऱ्या उमेदवारांनी इतर मागास वर्गाचे (OBC) जात प्रमाणपत्र प्राप्त केले असल्यास, अशा उमेदवारांना इतर मागास वर्गाचा (OBC) दावा उपलब्ध करून देण्याचा निर्णय घेण्यात आला आहे. त्यानुसार ज्या उमेदवारांनी इतर मागास वर्गाचे (OBC) जात प्रमाणपत्र प्राप्त केले आहे, अशा उमेदवारांनी इतर मागास वर्गाचा दावा करण्यासाठी विकल्प सादर करणे आवश्यक असल्याचे जाहिरातीमध्ये म्हटले आहे.
नव्याने अर्ज सादर करणाऱ्या उमेदवारांसाठी
संबंधित उमेदवार आयोगाच्या ऑनलाईन अर्ज प्रणालीमधील उमेदवारांच्या प्रोफाईल मधील "My Account" सदराखाली प्रस्तुत परीक्षेच्या जाहिरातीकरीता उपलब्ध करून देण्यात आलेल्या Link समोर दर्शविण्यात आलेल्या "Question" या बटनावर क्लिक करून विचारण्यात येणारी माहिती नमूद करून विकल्प सादर करू शकतील. सामाजिक व शैक्षणिकदृष्ट्या मागासवर्ग तसेच इतर मागासवर्गाचा दावा करण्याकरीता विकल्प सादर केल्यास संबंधित उमेदवाराचा मूळ अर्जातील दावा रद्द समजण्यात येईल. सामाजिक व शैक्षणिकदृष्ट्या मागासवर्गाचा तसेच इतर मागासवर्गाचा विकल्प सादर केलेल्या उमेदवारांना कोणत्याही परिस्थितीत आर्थिकदृष्ट्या दुर्बल घटक (EWS) चा लाभ घेता येणार नसल्याचे स्पष्ट करण्यात आले आहे. अधिक माहितीसाठी आयोगाच्या संकेतस्थळावर प्रसिद्ध करण्यात आलेले शुद्धीपत्रक उमेदवारांनी पाहाणे आवश्यक आहे.
