RTE प्रवेश प्रक्रियेतील १ किमीच्या जाचक अटीविरोधात मनविसेचे शिक्षण आयुक्तालयावर ढोल-ताशांच्या गजरात आंदोलन
ढोल-ताशे व भोंग्यांच्या गजरात आंदोलन करून शिक्षण मंत्री दादा भुसे व शिक्षण प्रशासनाला जागे करण्याचा प्रयत्न करण्यात आला. आंदोलनादरम्यान शिक्षण मंत्री दादा भुसे यांचे कुंभकर्णाच्या रूपातील प्रतीकात्मक पोस्टर लावून सरकार विद्यार्थ्यांच्या प्रश्नांबाबत झोपले आहे, असा आरोप मनसे कार्यकत्यांनी केला आहे.
eduvarta@gmail.com 
एज्युवार्ता न्यूज नेटवर्क
शिक्षण हक्क कायदा (RTE) अंतर्गत प्रवेश प्रक्रियेत राज्य सरकारने लागू केलेल्या घरापासून १ किमी अंतराच्या जाचक अटीमुळे (1 km distance condition) हजारो गरीब व आर्थिकदृष्ट्या दुर्बल विद्यार्थ्यांना (Economically weak students) प्रवेशापासून वंचित राहावे लागत असल्याच्या निषेधार्थ महाराष्ट्र नवनिर्माण विद्यार्थी सेना (Maharashtra Navnirman Student Sena), पुणे शहरच्या वतीने आज शिक्षण आयुक्तालयावर (Commissionerate of Education) आंदोलन करण्यात आले.
सध्या सुरू असलेल्या RTE प्रवेश प्रक्रियेत अनेक पालकांना विविध अडचणींचा सामना करावा लागत आहे. विशेषतः घरापासून १ किमी अंतराची अट लावण्यात आल्यामुळे अनेक विद्यार्थ्यांचे अर्ज स्वीकारले जात नाहीत. तसेच ऑनलाईन पोर्टलवरील तांत्रिक अडचणी, उत्पन्न दाखल्यासंदर्भातील गोंधळ आणि शाळांच्या उपलब्ध जागांची स्पष्ट माहिती नसल्यामुळे पालकांमध्ये मोठा संभ्रम निर्माण झाला आहे. परिणामी गरीब व सर्वसामान्य कुटुंबातील विद्यार्थ्यांच्या शिक्षणाच्या मूलभूत हक्कावर गदा येत असल्याची भावना पालकांमध्ये व्यक्त होत आहे.
मनविसेच्या शिष्टमंडळाने शिक्षण आयुक्तांची भेट घेऊन सद्यस्थितीची सविस्तर स्तर माहिती दिली. सुमारे सव्वा लाख विद्यार्थी अद्यापही RTE प्रवेशापासून वंचित असल्याचे त्यांना निदर्शनास आणून देण्यात आले. तसेच १ किमीच्या अटीमुळे मोठ्या प्रमाणावर विद्यार्थ्यांचे अर्ज स्वीकारले गेले नसल्याचेही सांगण्यात आले. यावर शिक्षण आयुक्तांनी सदर बाब शिक्षण मंत्र्यांच्या निदर्शनास आणून त्यावर मार्ग काढण्याचे तसेच RTE प्रवेश प्रक्रियेची मुदत वाढविण्याबाबत सकारात्मक निर्णय घेतला जाईल, असे आश्वासन दिले.
ढोल-ताशे व भोंग्यांच्या गजरात आंदोलन करून शिक्षण मंत्री दादा भुसे व शिक्षण प्रशासनाला जागे करण्याचा प्रयत्न करण्यात आला. आंदोलनादरम्यान शिक्षण मंत्री दादा भुसे यांचे कुंभकर्णाच्या रूपातील प्रतीकात्मक पोस्टर लावून सरकार विद्यार्थ्यांच्या प्रश्नांबाबत झोपले आहे, असा आरोप मनसे कार्यकत्यांनी केला आहे.
यावेळी मनविसेच्या वतीने RTE प्रवेश प्रक्रियेची मुदत तातडीने वाढविणे आणि घरापासून १ किमी अंतराची जाचक अट त्वरित रद्द करणे या प्रमुख मागण्या करण्यात आल्या. या अटीमुळे राज्यभरातील लाखो विद्यार्थ्यांना प्रवेश मिळण्यास अडथळे निर्माण झाले असल्याचेही आंदोलनकर्त्यांनी सांगितले. शासन व शिक्षण प्रशासनाने या गंभीर प्रश्नाकडे दुर्लक्ष केल्यास महाराष्ट्र नवनिर्माण विद्यार्थी सेना अधिक तीव्र आंदोलन छेडेल, असा इशाराही यावेळी देण्यात आला. विद्यार्थ्यांच्या हिताचा विचार करून शासनाने तातडीने सकारात्मक तोडगा काढावा, अशी मागणी मनविसेच्या वतीने करण्यात आली.
View this post on Instagram
