SPPU NEWS: सेट परीक्षा आता 27 सप्टेंबर रोजी होणार; विद्यापीठाची घोषणा
६ सप्टेंबर, २०२६ रोजी CTET ही केंद्रीय शिक्षक पात्रता परीक्षा पूर्वनियोजित असल्याने दोन्ही परीक्षा एकाच दिवशी आयोजित करण्यात आल्यास विद्यार्थ्यांना कोणत्याही एका परीक्षेपासून वंचित रहावे लागेल, त्यामुळे विद्यार्थ्यांच्या हिताचा विचार करून सेट परीक्षेची तारीख बदलण्यात यावी यासाठी विद्यार्थ्यांचे ईमेल व पत्र सेट विभागास प्राप्त झाले आहेत.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या सेट विभागातर्फे आयोजित केली जाणारी महाराष्ट्र राज्यस्तरीय पात्रता परीक्षा (सेट) 6 सप्टेंबर रोजी आता 27 सप्टेंबर रोजी आयोजित केली जाणार आहे. विद्यापीठाच्या सेट विभागाचे समन्वयक डॉ. प्रभाकर देसाई यांनी याबाबतचे प्रकटन प्रसिद्ध केले आहे.
विद्यापीठाच्या सेट विभागातर्फे ७ जुलै २०२६ रोजी सेट विभागाच्या संकेतस्थळावर जाहीर प्रकटन प्रसिध्द करण्यात आले होते. या प्रकटनात ४१ व्या सेट परीक्षेची संभाव्य तारीख ६ सप्टेंबर,अशी जाहीर करण्यात आली होती. या तारखेबाबत काही शैक्षणिक गैरसोय अथवा अडचणी निदर्शनास आल्यास त्या पडताळून त्यानुसार अंतिम निर्धारित तारीख पुढील १५ दिवसांत सविस्तर वेळापत्रकासह जाहीर करण्यात येईल, असे जाहीर करण्यात आले होते.परंतु, ६ सप्टेंबर, २०२६ रोजी CTET ही केंद्रीय शिक्षक पात्रता परीक्षा पूर्वनियोजित असल्याने दोन्ही परीक्षा एकाच दिवशी आयोजित करण्यात आल्यास विद्यार्थ्यांना कोणत्याही एका परीक्षेपासून वंचित रहावे लागेल, त्यामुळे विद्यार्थ्यांच्या हिताचा विचार करून सेट परीक्षेची तारीख बदलण्यात यावी यासाठी विद्यार्थ्यांचे ईमेल व पत्र सेट विभागास प्राप्त झाले आहेत.
विद्यार्थ्यांची मागणी लक्षात घेता कोणताही विद्यार्थी सेट परीक्षेपासून वंचीत राहू नये यासाठी ६ सप्टेंबर रोजी आयोजित करण्यात आलेली सेट परीक्षा पुढे ढकलण्यात येत असून आता ही परीक्षा येत्या २७ सप्टेंबर २०२६ रोजी आयोजित करण्यात येईल, याची संबंधितांनी नोंद घ्यावी, असे विद्यापीठातर्फे स्पष्ट करण्यात आले आहे.
विद्यापीठाच्या सेट विभागातर्फे महाराष्ट्र व गोवा राज्यातील उमेदवारांची सेट परीक्षा घेतली जाते.परीक्षा लवकर घ्यावी, आधी उमेदवारांची मागणी होती.मात्र एमपीएससीच्या परीक्षेनंतर CTET परीक्षा एकाच दिवशी येत असल्याने सेट परीक्षेच्या तारखेत बदल बदल करण्यात आला आहे.
