SPPU प्राध्यापक भरतीसाठी सर्व विषयांच्या पात्र उमेदवारांची यादी जाहीर
शैक्षणिक अनुभव, शैक्षणिक पात्रता आणि संशोधन या बाबी विचारात घेऊन उमेदवारांची गुणवत्ता यादी प्रसिद्ध करण्यात आली आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठातील विविध विभागांमध्ये पूर्णवेळ प्राध्यापक भरतीची प्रक्रिया सुरू आहे. त्याचप्रमाणे विद्यापीठातर्फे कंत्राटी पद्धतीवर सुमारे 130 हून अधिक जागा भरल्या जाणार आहेत. या जागांसाठी अर्ज केलेल्या सर्व पात्र उमेदवारांची यादी विद्यापीठाच्या संकेतस्थळावर प्रसिद्ध करण्यात आली आहे. उमेदवार https://admin.unipune.ac.in/recruitment/ या लिंक वर जाऊन यादी पाहू शकतात.
सावित्रीबाई फुले पुणे विद्यापीठातील विविध विभागातील 111 रिक्त जागांसाठी सुमारे आठ हजाराहून अधिक उमेदवारांनी अर्ज केले. त्यातील पात्र उमेदवारांची यादी जाहीर करून मुलाखती घेतल्या जात आहेत. लवकरच पूर्ण वेळ सहयोगी व सहाय्यक प्राध्यापक पदांच्या भरती प्रक्रियेला सुरुवात केली जाणार आहे. मात्र, त्यासाठी आणखी काही महिने लागणार आहेत. त्यामुळे विद्यापीठाने कंत्राटी पद्धतीवर पदभरती करण्याचा निर्णय घेतला. त्यानुसार जाहिरात प्रसिद्ध करण्यात आली.
कंत्राटी पद्धतीवर भरती केल्या जाणाऱ्या पदासाठी उमेदवारांनी अर्ज केले.प्राप्त झालेल्या अर्जांची छाननी करून तात्पुरती गुणवत्ता यादी विद्यापीठाच्या संकेतस्थळावर शुक्रवारी प्रसिद्ध केली आहे. प्रत्येक उमेदवाराचा एटीआर विचारात घेऊन संबंधित उमेदवाराला गुण देण्यात आले आहेत.
नवीन शैक्षणिक वर्ष सुरू झाले असून विद्यापीठातील सर्व विभागांमध्ये विद्यार्थ्यांची प्रवेश प्रक्रिया राबवली जात आहे. प्रवेशित विद्यार्थ्यांना शिकवण्यासाठी पूर्णवेळ प्राध्यापक उपलब्ध नसल्यामुळे कंत्राटी पद्धतीवर प्राध्यापकांची नियुक्ती केली जात आहे. शैक्षणिक अनुभव, शैक्षणिक पात्रता आणि संशोधन या बाबी विचारात घेऊन उमेदवारांची गुणवत्ता यादी प्रसिद्ध करण्यात आली आहे.
