SPPU नवीन अभ्यासक्रमांना मंजुरी; रोबोटिक्स, ई-व्हीकल आणि डिजिटल ह्युमॅनिटीजला प्राधान्य
अभियांत्रिकी शिक्षणाच्या क्षेत्रात बी.ई. (Advanced Communication Technology) या अभ्यासक्रमाच्या चतुर्थ वर्षाच्या अभ्यासक्रमाला मंजुरी देण्यात आली. तसेच एम.ई. मेकॅनिकल इंजिनिअरिंग (ईव्ही टेक्नॉलॉजी) या पदव्युत्तर अभ्यासक्रमाच्या नवीन आराखड्यास आणि अभ्यासक्रमालाही मान्यता मिळाली.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या व्यवस्थापन परिषदेच्या नुकत्याच पार पडलेल्या बैठकीत राष्ट्रीय शैक्षणिक धोरण (NEP-2020) ची प्रभावी अंमलबजावणी, शैक्षणिक गुणवत्ता वृद्धी, उद्योग-विद्यापीठ सहकार्य, नवीन अभ्यासक्रमांची निर्मिती आणि विद्यार्थी हिताच्या विविध विषयांवर महत्त्वपूर्ण निर्णय घेण्यात आले.
बैठकीत मानवविज्ञान विद्याशाखेअंतर्गत 'ॲडव्हान्स्ड कोर्स इन डिजिटल ह्युमॅनिटीज अँड आर्कायव्हिंग' (44 क्रेडिट) या नव्या पायाभूत अभ्यासक्रमास मंजुरी देण्यात आली. डिजिटल तंत्रज्ञानाच्या माध्यमातून सांस्कृतिक व ऐतिहासिक वारशाचे जतन आणि संशोधनाला चालना देण्याच्या उद्देशाने हा अभ्यासक्रम सुरू करण्यात येणार आहे.
तसेच, यांत्रिकी व मटेरियल टेक्नॉलॉजी विभागांतर्गत ड्रोन पायलटिंग, इलेक्ट्रिक व्हेईकल (EV) रिपेअरिंग, CAD-CAM 3D डिझाइन, CNC/VMC ऑपरेटर, इंडस्ट्रियल रोबोटिक्स आदी विषयांवरील सात फाउंडेशन व ॲडव्हान्स अभ्यासक्रमांना मान्यता देण्यात आली. उद्योग क्षेत्रातील बदलत्या गरजा लक्षात घेऊन विद्यार्थ्यांना आधुनिक तांत्रिक कौशल्ये प्राप्त व्हावीत, हा या निर्णयामागील उद्देश आहे.
अभियांत्रिकी शिक्षणाच्या क्षेत्रात बी.ई. (Advanced Communication Technology) या अभ्यासक्रमाच्या चतुर्थ वर्षाच्या अभ्यासक्रमाला मंजुरी देण्यात आली. तसेच एम.ई. मेकॅनिकल इंजिनिअरिंग (ईव्ही टेक्नॉलॉजी) या पदव्युत्तर अभ्यासक्रमाच्या नवीन आराखड्यास आणि अभ्यासक्रमालाही मान्यता मिळाली.
राष्ट्रीय शैक्षणिक धोरणानुसार अभियांत्रिकी शिक्षण अधिक लवचिक आणि बहुविषयक करण्याच्या दृष्टीने स्वायत्त (B.Tech.) आणि अस्वायत्त (B.E.) महाविद्यालयांसाठी Multidisciplinary Minor, Honors, Honors with Research आणि Double Minors या पदवी नामांकनालाही व्यवस्थापन परिषदेने मंजुरी दिली.
या निर्णयांमुळे उद्योगाभिमुख, कौशल्याधारित आणि संशोधनकेंद्रित शिक्षणाला चालना मिळणार असून, विद्यार्थ्यांना आधुनिक तंत्रज्ञानाशी सुसंगत शिक्षणाच्या नव्या संधी उपलब्ध होतील, असा विश्वास विद्यापीठ प्रशासनाने व्यक्त केला आहे.
