एमबीए/एमएमएस प्रवेशासाठी ५६ हजार ६६९ नोंदणी; पहिली CAP फेरी २८ जुलैपासून
प्रवेश प्रक्रियेच्या वेळापत्रकानुसार २२ जुलै २०२६ रोजी तात्पुरती गुणवत्ता यादी प्रसिद्ध केली जाणार आहे. या यादीबाबत विद्यार्थ्यांना २३ ते २५ जुलै दरम्यान ऑनलाइन तक्रारी नोंदविण्याची संधी असेल. त्यानंतर २७ जुलै रोजी अंतिम गुणवत्ता यादी जाहीर करण्यात येईल.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षामार्फत शैक्षणिक वर्ष २०२६-२७ साठी एमबीए/एमएमएस (MBA/MMS) अभ्यासक्रमाच्या प्रवेश नोंदणीची दुसरी मुदतवाढ संपल्यानंतर एकूण ६७ हजार ६१६ विद्यार्थ्यांनी प्रवेशासाठी नोंदणी केली आहे. त्यापैकी ५६ हजार ६६९ विद्यार्थ्यांनी प्रवेश अर्जाची पडताळणी करून अर्ज निश्चित केला असून हेच विद्यार्थी केंद्रीय प्रवेश प्रक्रियेच्या (CAP) पुढील फेऱ्यांमध्ये सहभागी होणार आहेत.
एमबीए/एमएमएस प्रवेशासाठी नोंदणी करण्याची अंतिम मुदत १९ जुलै २०२६ रोजी सायंकाळी ५ वाजेपर्यंत होती. त्यानंतर २० जुलैपर्यंत अर्जांची पडताळणी आणि निश्चितीची प्रक्रिया पूर्ण करण्यात आली. मागील शैक्षणिक वर्षात (२०२५-२६) एकूण ५९ हजार ४५६ विद्यार्थ्यांनी अर्ज निश्चित केले होते.
प्रवेश प्रक्रियेच्या वेळापत्रकानुसार २२ जुलै २०२६ रोजी तात्पुरती गुणवत्ता यादी प्रसिद्ध केली जाणार आहे. या यादीबाबत विद्यार्थ्यांना २३ ते २५ जुलै दरम्यान ऑनलाइन तक्रारी नोंदविण्याची संधी असेल. त्यानंतर २७ जुलै रोजी अंतिम गुणवत्ता यादी जाहीर करण्यात येईल.
प्रवेशाची पहिली CAP फेरी २८ जुलै रोजी सुरू होणार असून एकूण चार CAP फेऱ्यांद्वारे प्रवेश प्रक्रिया राबविण्यात येणार आहे. त्यानंतर संस्थास्तरीय प्रवेश प्रक्रिया पार पडेल. संपूर्ण प्रवेश प्रक्रिया १५ सप्टेंबर २०२६ रोजी सायंकाळी ५ वाजेपर्यंत पूर्ण होणार असल्याची माहिती सीईटी कक्षाने दिली आहे.
सीईटी कक्षाने विद्यार्थ्यांना प्रवेश प्रक्रियेचे सविस्तर वेळापत्रक आणि अद्ययावत माहितीसाठी अधिकृत संकेतस्थळावर नियमितपणे माहिती पाहण्याचे आवाहन केले आहे.
