CET CELL: फाईन आर्ट प्रवेशाची पहिली कॅप फेरी २४ ते २७ जुलै; राज्यभरातून १ हजार ३२४ विद्यार्थ्यांची नोंदणी
कॅप फेरी-१ चे तात्पुरते जागावाटप २९ जुलै रोजी सायंकाळी ५.३० नंतर जाहीर करण्यात येणार आहे. त्यानंतर ३० जुलै ते ३ ऑगस्ट या कालावधीत विद्यार्थ्यांनी लॉग-इनद्वारे देण्यात आलेली जागा स्वीकारावी.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षामार्फत शैक्षणिक वर्ष २०२६-२७ साठी फाईन आर्ट (Fine Art) अभ्यासक्रमाच्या प्रवेश प्रक्रियेचे वेळापत्रक जाहीर करण्यात आले आहे. चार वर्षांच्या पूर्णवेळ बॅचलर ऑफ फाईन आर्ट (BFA) पदवी अभ्यासक्रमाच्या केंद्रीभूत प्रवेश प्रक्रियेची (CAP) पहिली फेरी २४ ते २७ जुलै २०२६ या कालावधीत होणार असून राज्यभरातील १ हजार ३२४ विद्यार्थ्यांनी प्रवेश अर्जांची पडताळणी व निश्चिती केली आहे.
सीईटी कक्षाकडून प्राप्त झालेल्या माहितीनुसार, बीएफए अभ्यासक्रमातील रेखा व रंगकला, शिल्पकला, वस्त्रकला, मातीकाम, अंतर्गत गृहसजावट, धातुकला आणि उपयोजित कला या शाखांसाठी प्रवेश प्रक्रिया राबविण्यात येत आहे. प्रवेश नोंदणी ७ जुलैपासून सुरू होऊन १४ जुलैपर्यंत होती. त्यानंतर विद्यार्थ्यांच्या सोयीसाठी १९ जुलैपर्यंत मुदतवाढ देण्यात आली होती. अंतिम मुदतीनंतर १,३२४ विद्यार्थ्यांनी अर्ज पडताळणी करून प्रवेश अर्ज निश्चित केले आहेत. मागील शैक्षणिक वर्षात ही संख्या १,४१५ होती.
सीईटी कक्षाने २४ जुलै रोजी पहिल्या कॅप फेरीसाठी उपलब्ध प्रवर्गनिहाय जागांचा (Seat Matrix) तपशील संकेतस्थळावर प्रसिद्ध केला आहे. पात्र विद्यार्थ्यांनी २४ ते २७ जुलै, रात्री ११.५९ वाजेपर्यंत आपल्या लॉग-इनद्वारे ऑनलाइन पसंतीक्रम (Option Form) भरून तो निश्चित करणे आवश्यक आहे.
कॅप फेरी-१ चे तात्पुरते जागावाटप २९ जुलै रोजी सायंकाळी ५.३० नंतर जाहीर करण्यात येणार आहे. त्यानंतर ३० जुलै ते ३ ऑगस्ट या कालावधीत विद्यार्थ्यांनी लॉग-इनद्वारे देण्यात आलेली जागा स्वीकारावी. तसेच संबंधित महाविद्यालयात आवश्यक कागदपत्रे सादर करून शुल्क भरून प्रवेश निश्चित करावा लागणार आहे.
प्रवेश प्रक्रियेत एकूण दोन कॅप फेऱ्या होणार असून, त्यानंतरही जागा रिक्त राहिल्यास मॉप-अप फेरी राबविण्यात येईल. पुढे संस्थास्तरीय रिक्त जागांसाठी स्वतंत्र प्रवेश प्रक्रिया होणार आहे. संपूर्ण प्रवेश प्रक्रिया २९ ऑगस्ट २०२६ रोजी पूर्ण होणार असल्याची माहिती सीईटी कक्षाने दिली आहे.
प्रवेशाचे सविस्तर वेळापत्रक, प्रवर्गनिहाय जागा आणि अद्ययावत माहितीसाठी विद्यार्थ्यांनी सीईटी कक्षाच्या अधिकृत संकेतस्थळाला भेट देण्याचे आवाहन करण्यात आले आहे.
