ECF स्टडी सेंटरच्या नावाखाली चालणाऱ्या इंटिग्रेटेड कॉलेजचा पर्दाफाश;मनविसेचे आंदोलन
या सेंटरच्या माध्यमातून बाणेर येथील नमो आरआयएम कॉलेज, मगरपट्टा सिटी, हडपसर येथील विश्वा कॉलेज तसेच वानवडी येथील एस.बी. गिरमे ज्युनिअर कॉलेज यांचे प्रवेश दिले जात असल्याचा दावा करण्यात आला.त्याबाबतचे पुरावे येथे आढळून आले आहेत.
eduvarta@gmail.com 
एज्युवार्ता न्यूज नेटवर्क
इंटिग्रेटेड कॉलेजच्या नावावर सुरू असलेला शिक्षणातील काळाबाजार मोठ्याप्रमाणावर फोफावत असताना त्याच्याही पुढची आवृत्ती समोर आली आहे. महाराष्ट्र नव निर्माण विद्यार्थी सेनेने अनधिकृतपणे चालवल्या जात असलेल्या पुण्यातील स्वारगेट परिसरातील EPF स्टडी सेंटर विरोधात शुक्रवारी आंदोलन करून शिक्षणाच्या नावाखाली सुरू असलेला गोरखधंदा उधळून लावला आणि इंटिग्रेटेड कॉलेजचा पर्दाफाश केला. शिक्षण विभागाने अशा सर्व बेकायदेशीर दुकानदारी करणाऱ्या क्लास चालकांविरोधात कठोर कारवाई करावी, अशी मागणी मनविसेतर्फे करण्यात आली आहे.
स्वारगेट परिसरातील एज्युकेशन करिअर फाउंडेशन अर्थात ईसीएफ स्टडी सेंटरमध्ये बोगस इंटिग्रेटेड कॉलेज सुरू असल्याचा आरोप करत महाराष्ट्र नवनिर्माण विद्यार्थी सेनेच्या वतीने आंदोलन करण्यात आले. यावेळी शिक्षण विभागाचे अधिकारीही चौकशीसाठी दाखल झाले होते. बीए,बी कॉम,बीबीए बीसीए, एम कॉम या अभ्यासक्रमाबाबत येथे मार्गदर्शन केले जात असल्याचा बोर्ड लावण्यात आला आहे. पुणे शहरात विविध ठिकाणी आशा बेकायदेशीर संस्थांचा सुळसुळाट झाला असून त्यातून वेगळी नफेखोरी करणारी शैक्षणिक यंत्रणा निर्माण झाली आहे. या सेंटरच्या माध्यमातून बाणेर येथील नमो आरआयएम कॉलेज, मगरपट्टा सिटी, हडपसर येथील विश्वा कॉलेज तसेच वानवडी येथील एस.बी. गिरमे ज्युनिअर कॉलेज यांचे प्रवेश दिले जात असल्याचा दावा करण्यात आला.त्याबाबतचे पुरावे येथे आढळून आले आहेत.
महाराष्ट्र नवनिर्माण विद्यार्थी सेनेचे धनंजय दळवी म्हणाले, ईसीएफ स्टडी सेंटर कोणत्याही परवानगीशिवाय बेकायदेशीरपणे चालवले जाते. येथे इयत्ता अकरावी बारावीसह इतरही अभ्यासक्रमाचे प्रवेश दिले जातात. या ठिकाणी विद्यार्थ्यांच्या प्रात्यक्षिक परीक्षा घेतल्या जातात. परिसरातील वेगवेगळ्या खाजगी क्लास चालकांना या सेंटरच्या माध्यमातून विद्यार्थी पुरवले जातात. विद्यार्थ्यांकडून मिळालेल्या शुल्कातील टक्केवारी खाजगी क्लास चालक आणि महाविद्यालयांचे कौन्सिलर यांच्यात वाटली जाते. विद्यार्थ्यांना लुबाडून शिक्षणाच्या नावाखाली सुरू असलेला हा गोरख धंदा बंद करण्यासाठी महाराष्ट्र नवनिर्माण विद्यार्थी सेनेतर्फे आंदोलन करण्यात आले.
आंदोलनाची दखल घेत उपशिक्षणाधिकारी किशोर चंदेल आणि सहाय्यक शिक्षण उपनिरीक्षक पद्मा दिंडे यांनी संबंधित स्टडी सेंटरमध्ये जाऊन चौकशी केली. तसेच खडक पोलीस ठाण्याचे वरिष्ठ पोलीस निरीक्षक यशवंत निकम यांनीही घटनास्थळी भेट दिली.दरम्यान, आशा बेकायदेशीर ठिकाणी प्रवेश घेण्याऐवजी विद्यार्थ्यांनी अधिकृत महाविद्यालयात प्रवेश घ्यावा,असे आवाहन मनविसेतर्फे करण्यात आले.
