विद्यापीठ प्रशासनाचा भोंगळ कारभार; सीसीटीव्हीत 'त्या' गाडीचा नंबरच सापडेना

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University) मुलींच्या वसतीगृहाच्या चौका जवळून एका रडत असलेल्या मुलीला चारचाकी गाडीत घालून अज्ञात व्यक्ती विद्यापीठातून पसार झाल्याची धक्कादायक घटना शुक्रवारी रात्री साडेआठ वाजण्याच्या सुमारास घडली. त्यानंतर शनिवारी पहाटे साडेपाच वाजेपर्यंत पोलिसांनी विद्यापीठातील सीसीटीव्ही फुटेज तपासले. मात्र, त्यात संबंधीत गाडीचा नंबरच दिसला नाही,असे विश्वसनीय सूत्रांकडून सांगितले जात आहे. त्यामुळे विद्यापीठातील सीसीटीव्ही कॅमेऱ्यांची काय अवस्था आहे, हे स्पष्ट उघड होते. विद्यापीठात तब्बल दोन कोटी रुपयांचे सीसीटीव्ही कॅमेरे बसवण्यात आले आहेत. तरीही त्यातून गाडीचा नंबर सापडत नाही, यावरून विद्यापीठ प्रशासनात कसा भोंगळ कारभार सुरू आहे, हे स्पष्ट होते. 

पुणे विद्यापीठाच्या आवारातून एका मुलीला अज्ञात व्यक्ती चारचाकी गाडीत घेऊन फरार झाला. मात्र, त्यांच्या साथीदारांना विद्यापीठातील विद्यार्थ्यांनी आणि विद्यापीठाच्या सुरक्षा रक्षकांनी पकडले. तसेच संबंधितांना पोलिसांच्या ताब्यात दिले. याबाबतचे वृत्त सर्वप्रथम 'एज्युवार्ता'ने दिले. पोलिस आता अज्ञात व्यक्तीच्या साथीदारांकडून घडलेल्या घटनेची माहिती काढूनही घेतील.मात्र, येथे प्रश्न विद्यापीठाच्या सुरक्षेचा आहे. विद्यापीठाच्या मुलींच्या वसतीगृहासमोरच सीसीटीव्ही कॅमेरे नसल्याचे विद्यापीठातील सूत्रांकडून सांगितले जात आहे. कोण गेले कोण आहे. हेच नीटपणे तपासता येत नाही. त्यामुळे विद्यापीठ प्रशासन काय करते आहे? असा प्रश्न निर्माण होतो. 

हेही वाचा: रडणाऱ्या मुलीला चारचाकीत घालून अज्ञात विद्यापीठातून फरार; दोन साथीदार पकडले

गेल्या महिन्यात विद्यापीठातील मुलींच्या वसतीगृहातच मुली मद्यप्राशन करत असल्याची माहिती समोर आली होती. त्यावेळी सुध्दा मुलींनी या दारूच्या बाटल्या कोठून आणल्या. त्यावेळी वसतीगृहातील कर्मचारी व अधिकारी तसेच सुरक्षा विभागातील कर्मचारी काय करता होते? असा सवाल उपस्थित करण्यात आला होता. दरम्यान, विद्यापीठातील अनेक सीसीटीव्ही कॅमेरे बंद असून ते तात्काळ दुरूस्त करावेत,अशी सूचना अधिसभा सदस्य डॉ.बी. बी. सांगडे यांनी विद्यापीठ प्रशासनाला दिल्या होत्या.परंतु, घडलेल्या घटनेवरून  विद्यापीठ प्रशासन अजूनही जागे झाले नसल्याचे दिसून येत आहे. 

विद्यापीठ आता सुरक्षा व्यवस्था वाढवणार: प्रभारी कुलसचिव 

शुक्रवारी रात्री घडलेल्या घटनेच्या पार्श्वभूमीवर विद्यापीठाच्या प्रभारी कुलसचिव डॉ. ज्योती भाकरे यांच्याशी संपर्क साधला असता त्या म्हणाल्या, विद्यापीठ परिसरात 'सीसीटीव्ही'ची तसेच सुरक्षा रक्षकांची संख्या वाढवली जाणार आहे.अधिसभेत मांडलेल्या सुचनेनंतर सीसीटीव्ही बसविण्यात आले होते.आता आणखी काही कॅमेरे बसविले जाणार आहेत.