स्टार्स प्रकल्पांतर्गत शिक्षकांना मिळणार, २० विषयांचे ऑनलाईन धडे 

एज्युवार्ता न्यूज नेटवर्क

राज्य शासनाच्या स्टार्स प्रकल्पांतर्गत प्राथमिक व माध्यमिक शिक्षकांना प्रशिक्षणासाठी एकूण २० विषयांवर 'ब्लेन्डेट ऑनलाइन कोर्स' (Blendate Online Course)  सुरू करण्यात आले आहेत. इयत्ता पहिली ते दहावीपर्यंतच्या विद्यार्थ्यांना शिकवणाऱ्या सर्व शिक्षकांसाठी जिल्हा शिक्षण व प्रशिक्षण संस्थेच्या (District Education and Institutions Institute) माध्यमातून ब्लेन्डेट मोड कोर्स प्रशिक्षणास ऑनलाइन सुरुवात झाली आहे. प्रत्येक विषयासाठी शिक्षकांना पाच तासांचा वेळ लागणार असल्याचे सांगण्यात आले आहे. राज्यातील शासकीय, स्थानिक स्वराज्य संस्था, खासगी अनुदानित व विनाअनुदानित प्राथमिक व माध्यमिक शाळेतील शिक्षकांना ऑनलाइन ब्लेंडेड कोर्ससाठी नोंदणी करता येणार आहे.

स्टार्स प्रकल्पांतर्गत प्राथमिक व माध्यमिक शिक्षकांसाठी मराठी, इंग्रजी, गणित, विज्ञान आणि सामाजिक या विषयांचे ब्लेंडेड कोर्सेस उपलब्ध करून देण्यात आले आहेत. हा कोर्स मराठी माध्यमात उपलब्ध असणार आहे. इतर माध्यमातील शिक्षकांनाही कोर्स करता येणार आहे. एका शिक्षकाला एकाच कोर्ससाठी नोंदणी करता येईल. कोर्स पूर्ण करताना कोर्समधील सर्व व्हिडीओ पूर्णपणे पाहून विषयाची माहिती मिळवणे आवश्यक आहे. नवे व्हिडीओ पाहून झाल्यावरच मूल्यमापनासाठी प्रश्न उपलब्ध होणार आहेत. 

सर्व शिक्षकांनी सातत्यपूर्ण व्यावसायिक विकासासाठी हा कोर्स करणे आवश्यक आहे. त्यासाठी 'दिक्षा'वर नाव नोंदणी करून शिक्षकांना हा कोर्स पूर्ण करावा लागणार आहे. हा कोर्स पूर्ण करणाऱ्या शिक्षकांना ब्लेन्डेट मोड कोर्स पूर्ण केल्यानंतर त्याबाबतचे प्रमाणपत्र दिले जाणार असून त्याची सेवापुस्तिकेमध्ये नोंदसुद्धा केली जाणार असल्याचे सांगण्यात आले आहे.