फार्मसीच्या विद्यार्थ्यांचे भविष्य टांगणीला; मार्चमध्ये कॉलेज सुरू होण्याची शक्यता

एज्युवार्ता न्यूज नेटवर्क 

औषध निर्माणशास्त्र शाखेची (Pharmacy Admission Process 2024) प्रवेश प्रक्रिया लांबणीवर पडली आहे. दोन फेऱ्या झाल्यानंतर ही प्रक्रिया थांबविण्यात आली. या फेऱ्यांमध्ये प्रवेश क्षमतेच्या ६० टक्के जागा भरण्यात आल्या.  अभ्यासक्रम (Pharmacy courses) सुरू न झाल्याने ५३ हजार ८०० विद्यार्थ्यांचे शैक्षणिक भवितव्य टांगणीला लागले आहे. राज्यभरातील १ हजार ३८१ फार्मसी महाविद्यालयात ही प्रवेश प्रक्रिया पार पडत आहे. 

फार्मसी कौन्सिल ऑफ इंडियाने (पीसीआय) नवीन फार्मसी महाविद्यालयांना परवानगी दिली. शिवाय, काही महाविद्यालयांची प्रवेश क्षमता वाढविली. परंतु विधानसभा निवडणुकीची आचारसंहिता लागल्याने या संदर्भातील शासन निर्णय झालेला नाही. त्यापूर्वी सध्या अस्तित्वात असलेल्या महाविद्यालयांचे प्रवेशाचे दोन राऊंड पूर्ण झाले होते. यामध्ये डी. फार्म., बी. फार्म. आणि एम. फार्म. च्या ६० टक्के जागा भरण्यात आल्या. यानंतर प्रवेश प्रक्रिया थांबविण्यात आली.

प्रथम वर्षाचे पहिली सत्र परीक्षा डिसेंबरमध्ये घेतली जाते. यासाठी अवघे काही दिवस शिल्लक आहेत. आणखी प्रवेश प्रक्रियाही पार पडलेली नाही.  त्यामुळे डिसेंबरमध्ये परीक्षा घेणे अशक्य आहे. एका सत्रासाठी किमान ९० दिवसांचा अभ्यासाचा कालावधी आहे. आता सरकार स्थापनेनंतर शासन निर्णय होऊन प्रवेश प्रक्रिया सुरू झाल्यास मार्च महिन्यात पहिले सेमिस्टर होऊ शकते.