'एमपीएससी'च्या इतिहासातील सर्वात मोठी जाहिरात प्रसिद्ध; 'या' तारखेपासून अर्ज प्रक्रिया सुरू 

एज्युवार्ता न्यूज नेटवर्क

पशुसंवर्धन विभागाचे काम पूर्ण क्षमतेने करण्यासाठी राज्याच्या पशुसंवर्धन मंत्री पंकजा मुंडे (Pankaja Munde) यांनी महत्त्वाचे पाऊल उचलले असून सदरील विभागातील रिक्त पदे भरण्याचा निर्णय घेतला आहे. त्यानुसार महाराष्ट्र लोकसेवा आयोगाने (Maharashtra Public Service Commission) आजपर्यंतच्या इतिहासातील सेवा गट- अ मधील सर्वात मोठी भरतीची जाहिरात प्रसिद्ध (advertisement published) केली आहे. प्रसिद्ध करण्यात आलेल्या जाहिरातीनुसार या भरती अंतर्गत २ हजार ७९५ पदे (2 thousand 795 posts)  भरण्यात येणार आहेत. त्यासाठी २९ एप्रिलपासून ऑनलाईन पद्धतीने अर्ज प्रक्रिया सुरू करण्यात येणार आहे. 

पशुधन विकास अधिकारी पदासाठी महाराष्ट्र लोकसेवा आयोगामार्फत भरती प्रक्रिया सुरू करण्यात आली आहे. या भरतीमोहिमेअंतर्गत एकूण २ हजार ७९५ जागा भरल्या जाणार आहेत. ज्यात गट अ संवर्गातील पदांचा समावेश करण्यात आला आहे. या पदासाठी पात्र आणि इच्छुक उमेदवारा आयोगाचे अधिकृत संकेतस्थळ https://mpsc.gov.in/home वर जाऊन सविस्तर माहिती घेऊ शकतात. यासाठी २९ एप्रिल ते १८ मे या कालावधीत अर्ज प्रक्रिया राबवली जाणार आहे. 

या भरती प्रक्रियेत सहभागी होणाऱ्या उमेदवाराचे किमान वय १८ वर्षे पूर्ण असावे, तर कमाल वय मर्यादा ३८ वर्षापर्यंत ठेवण्यात आली आहे. भरती नियमाप्रमाणे आरक्षित संवर्गातील उमेदवारांना वयोमर्यादेत सुट देण्यात आली आहे. खुला प्रवर्गातील उमेदवारांना ३९४ रुपये परीक्षा शुल्क आकारण्यात येणार आहे तर इतर सर्व राखीव संवर्गातील उमेदवारांना २९४ रुपये अर्ज शुल्क भरावा लागेल. 

ग्रामीण भागात पशुसंवर्धन विभागाचे काम गतीने व पूर्ण क्षमतेने होण्यासाठी पशुसंवर्धन विभागातील पशुसंवर्धन व दुग्धव्यवसाय आयुक्तालय तसेच त्यांच्या अधिनस्त क्षेत्रिय कार्यालयातील पशुधन विकास अधिकारी पद महत्त्वाचे आहे. सुधारित आकृतीबंधानुसार महाराष्ट्र पशुसंवर्धन सेवा गट अ अंतर्गत पशुधन विकास अधिकारी संवर्गात एकूण ४६८४ पदे मंजूर आहेत. त्यापैकी सद्यःस्थितीत १८८६ पदे भरलेली असून २७९८ पदे रिक्त आहेत. तसेच ३१ डिसेंबर २०२५ अखेर ८ पदेसेवानिवृत्तीमुळे रिक्त होणार आहेत, अशी एकूण २८०६ पदे रिक्त होणार आहेत. ही पदे रिक्त असल्याने कामकाजावर परिणाम होत होता.