उपमुख्यमंत्र्यांचा ताफा अडवला, बीडमध्ये शिक्षक आक्रमक 

एज्युवार्ता न्यूज नेटवर्क 

शिक्षक धनंजय नागरगोजे (Teacher Dhananjay Nagargoje) यांनी फेसबुक पोस्ट करत आत्महत्या केल्याच्या घटनेमुळे विना अनुदानित शाळेचा (Unaided Ashram School) मुद्दा पुन्हा ऐरणीवर आला आहे. राज्याचे उपमुख्यमंत्री आणि बीड जिल्ह्याचे पालकमंत्री अजित पवार (Deputy CM Ajit Pawar) यांचा ताफा अडवत (Ajit Pawar's convoy stopped) जोरदार घोषणाबाजी करण्यात आली. मागील आठ दिवसांपासून उपोषण करणाऱ्या शिक्षकांचा अखेर संयमाचा बांध फुटल्याचे पाहायला मिळाले. जिल्हाभरातील विना अनुदानित शाळेतील शिक्षकांनी आक्रमक पवित्रा घेतल्याचे दिसून आले. बीड-अहिल्यानगर रोडवरून पवार यांचा ताफा जात असताना हा सर्व प्रकार घडला आहे. 

आतापर्यंत सरकारने आम्हाला फक्त आश्वासन दिले आहेत. शासनाचे आमच्याकडे दुर्लक्ष आहे. आज आम्हाला अजित दादांनी भेट दिलीच पाहिजे. आम्हाला १०० टक्के वेतन श्रेणी मिळाली पाहिजे, आम्हाला न्याय मिळाला पाहिजे. १६२ आश्रमशाळेतील शिक्षकाच्या वतीने विनंती करण्यात येत आहे त्यांनी या ठिकाणी येवून आम्हाला दोन मिनिटांचा वेळा द्यावा आणि आमच्या मागण्या मान्य कराव्यात, असे मत यावेळी काही महिला शिक्षकांनी माध्यमांशी बोलताना व्यक्त केले आहे. 

जोपर्यंत अजित पवार भेट घेणार नाहीत तोपर्यंत आम्ही येथून घरी जाणार नाहीत. आम्ही घर दार सोडून येथे आलो आहोत, मरायचे का जगायचे हे अजित दादाच सांगतील. काय होयचं तर होवू द्या.. आम्ही इथून उठणार नाहीत, असा आक्रोस काही महिला शिक्षकांनी केला. आमचा संयम आणि सहनशीलता संपली आहे. आता काहीच होवू शकत नाही. मेल्याशिवाय आम्हाला पर्याय शिल्लक राहिलेला नाही. मागील २० वर्षे आम्ही बिना पगारी मरत आलो आहेत. त्यामुळे आता मरणाची भीती राहिलेली नाही अशा भावना यावेळी व्यक्त करण्यात आल्या आहेत.  

आत्महत्याग्रस्त शिक्षक धनंजय नागरगोजे यांना न्याय मिळवून देण्यासाठी जिल्ह्यात मागील आठ दिवसांपासून उपोषण सुरू आहे. मात्र, सरकारने त्याकडे पाठ फिरवली, असा आरोप यावेळी शिक्षकांनी केला. 'आमच्या जीवाचे बरे वाईट झाले तर त्याला सर्वस्वी सरकार जबाबदार असेल' असा इशारा यापूर्वीच शिक्षकांनी दिला होता. बीडच्या दौऱ्यावर असलेले अजित पवार आंदोलनस्थळी येतील, उपोषणकर्त्यांची भेट घेतील आणि मागण्या मान्य करतील, असे शिक्षकांना वाटत होते. मात्र, तसेच काहीच न झाल्याने शिक्षक आक्रमक झाल्याचे यावेळी पाहायला मिळाले.  

उपोषणकर्त्या शिक्षकांनी मागण्यांमध्ये विना अनुदानित शाळेतील शिक्षकांना तात्काळ अनुदान देण्यात यावे. त्याचबरोबर धनंजय नागरगोजे यांना न्याय मिळावा व त्यांच्या कुटुंबियांना आर्थिक मदत करावी. याशिवाय धनंजय नागरगोजे यांच्या पत्नीला शासकीय सेवेत सामावून घ्यावे. त्याचबरोबर त्यांना ५० लाख रुपयांची आर्थिक मदत करावी; अशी देखील मागणी या शिक्षकांनी केली आहे. आम्ही गेल्या आठ दिवसापासून या ठिकाणी उपोषण करत आहोत. साधा आम्हाला एक फोन देखील कोणी केला नाही. तसेच प्रशासनातील अधिकारी किंवा शासनाचे प्रतिनिधी कोणीही आम्हाला भेटायला आलेले नाहीत. ही लाजिरवाणी बाब आहे, असे शिक्षकांचे म्हणणे आहे.