पुण्यात आता ZP शाळेतील शिक्षकाकडून बाल लैंगिक अत्याचार

एज्युवार्त न्यूज नेटवर्क 

शाळेतील अल्पवयीन मुला-मुलींवर होणाऱ्या लैंगिक अत्याचाराचे (Sexual assault) सत्र राज्यात सुरूच आहे. त्यातच दोन दिवसांपुर्वी कर्वेनगर परिसरातील नामांकित शाळेत घडलेल्या घटनेमुळे संपूर्ण राज्यात संतापाची लाट उसळली असताना आता कारेगाव जिल्हा परिषद शाळेतून (Karegaon Zilla Parishad School) धक्कादायक घटना समोर आली आहे. शाळेतील शिक्षकाने काही अल्पवयीन मुलींची छेडछाड आणि मनास लज्जा उत्पन्न होईल,असे कृत्य केल्याप्रकरणी बाल लैंगिक अत्याचाराच्या घटनेने पुन्हा एकदा खळबळ उडाली आहे. त्यामुळे शिक्षकच असे कृत्य करत असतील तर पालकांनी आपल्या पाल्यांना कोणाच्या भरवशावर शाळेत पाठवावे,असा प्रश्न निर्माण झाला आहे. 

 या प्रकरणी संतप्त पालकांनी रांजणगाव एमआयडीसी पोलीस स्टेशन येथे तक्रार दाखल केला आहे. त्यानंतर प्रकरणाची गंभीर दखल घेत पोलिसांनी तत्काळ आरोपी शिक्षकाला अटक केली आहे. पोलिसांनी दिलेल्या माहितीनुसार, अनिल महादेव शेळके (वय. ५२, रा. सोने सांगवी, ता. शिरूर, पुणे) असे आरोपी शिक्षकाचे नाव आहे. 

अनिल शेळके ही व्यक्ती कारेगाव येथील प्राथमिक शाळेत शिक्षक म्हणून कार्यरत आहे. शाळेतील मुलींसोबत गैरवर्तन करणे, मुलींना चुकीच्या पद्धतीने स्पर्श करणे, मुलींच्या मनास लज्जा उत्पन्न होईल, असे कृत्य हा शिक्षक करत होता. इयत्ता सहावी आणि सातवीच्या लहान मुलींसोबत असे कृत्य घडत असताना आरोपी शिक्षक शेळके यांनी मुलींना कोणालाही न सांगण्याची धमकी दिली होती. 

याबाबत विद्यार्थिनींनी पालकांना सांगितल्यानंतर पालक, शाळेतील इतर शिक्षकांशी मुख्याध्यापकांशी व गावातील पदाधिकाऱ्यांची संपर्क साधून संबंधित शिक्षकाचा प्रताप कानावर घातल्यावर मुख्याध्यापक यांनी रांजणगाव एमआयडीसी पोलीस स्टेशनला फिर्याद दिली. त्यानंतर बाल लैंगिक अत्याचार अंतर्गत गुन्हा दाखल करण्यात आला आहे. आरोपी शिक्षक शेळके यास अटक करण्यात आली असल्याचे पोलीस निरीक्षक महादेव वाघमोडे यांनी सांगितले आहे.