बारामतीतील हरिभाऊ गजानन देशपांडे इंग्लिश मिडीयम स्कूलच्या विद्यार्थ्यांचे 'रंगोत्सव' चित्रकला स्पर्धेत घवघवीत यश

एज्युवार्ता न्यूज नेटवर्क 

बारामती येथील महाराष्ट्र एज्युकेशन सोसायटीच्या हरिभाऊ गजानन देशपांडे इंग्लिश मिडीयम स्कूलच्या  विद्यार्थ्यांनी 'रंगोत्सव' अंतर्गत आयोजित हँडरायटिंग, कलरिंग आणि फिंगरप्रिंट स्पर्धांमध्ये उल्लेखनीय यश संपादन करत शाळेच्या शिरपेचात आणखी एक मानाचा तुरा खोवला आहे.

विद्यार्थ्यांनी आपल्या सर्जनशीलतेचा, मेहनतीचा आणि सातत्यपूर्ण सरावाचा उत्कृष्ट आविष्कार सादर करत विविध गटांमध्ये पुरस्कार पटकावले. स्पर्धेतील यशस्वी विद्यार्थ्यांमध्ये इयत्ता पहिलीतील कु. तेजल घोंडगे हिला प्रशस्तीपत्र, इयत्ता दुसरीतील कु. शिवन्या कवितके हिला प्रशस्तीपत्र व भेटवस्तू, इयत्ता तिसरीतील चि. समर्थ जव्हेरी याला ट्रॉफी व प्रशस्तीपत्र, तसेच कु. श्रीशा बोराटे हिला विशेष भेटवस्तू मिळाली. इयत्ता सहावीतील कु. नायरा व्हटकर हिने प्रशस्तीपत्र, पदक व ट्रॉफी प्राप्त केली, तर चि. विराज भोसले याला प्रशस्तीपत्र व पदकाने गौरविण्यात आले.

या विद्यार्थ्यांच्या उल्लेखनीय यशाबद्दल शाळेच्या मुख्याध्यापिका, सर्व शिक्षक-शिक्षकेतर कर्मचारी तसेच महाराष्ट्र एज्युकेशन सोसायटी यांच्या वतीने विद्यार्थ्यांचे, त्यांना मार्गदर्शन करणाऱ्या शिक्षकांचे आणि पालकांचे मनःपूर्वक अभिनंदन करण्यात आले.

विद्यार्थ्यांनी भविष्यातही विविध स्पर्धांमध्ये अशाच प्रकारे यश संपादन करून शाळेचा नावलौकिक अधिक उंचवावा, अशी अपेक्षा व्यक्त करत त्यांना पुढील वाटचालीसाठी शुभेच्छा देण्यात आल्या.