गरवारे प्रशालेतील विद्यार्थ्यांनी साकारल्या आकर्षक पर्यावरणपूरक रॉकेटच्या प्रतिकृती

एज्युवार्ता न्यूज नेटवर्क 

राष्ट्रीय अंतराळ दिनाचे औचित्य साधून गरवारे प्रशालेतील इयत्ता नववीच्या विद्यार्थ्यांनी आणि विज्ञान मंडळाच्या सदस्यांनी आकर्षक व पर्यावरणपूरक रॉकेटच्या प्रतिकृती साकारल्या. गरवारे प्रशाला विज्ञान मंडळ आणि विज्ञान भारती यांच्या संयुक्त विद्यमाने या विशेष उपक्रमाचे आयोजन करण्यात आले.

या उपक्रमात विद्यार्थ्यांनी विविध पर्यावरणपूरक साहित्याचा वापर करून रॉकेटच्या प्रतिकृती तयार केल्या. प्रतिकृती तयार करताना विद्यार्थ्यांनी मोठ्या उत्साहाने सहभाग घेतला. रॉकेटची रचना, त्यामागील विज्ञान आणि कार्यपद्धती समजून घेत प्रत्यक्ष कृतीतून विज्ञान शिकण्याचा अनुभव विद्यार्थ्यांना मिळाला.

या वेळी डॉ. संजय पुजारी यांनी विद्यार्थ्यांना रॉकेटची रचना, कार्यपद्धती आणि भारताच्या अंतराळ संशोधन क्षेत्रातील प्रगती याबाबत सोप्या व सहज भाषेत सखोल माहिती दिली. इस्रोच्या माध्यमातून भारताने राबविलेल्या विविध अंतराळ मोहिमांचे व्हिडिओ विद्यार्थ्यांना दाखविण्यात आले. तसेच भारताच्या चांद्रयान मोहिमा आणि रॉकेट कशा प्रकारे कार्य करते, याची माहितीही देण्यात आली.

भारताचे चांद्रयान चंद्रावर पोहोचल्याच्या ऐतिहासिक कामगिरीच्या स्मरणार्थ आयोजित या उपक्रमामुळे विद्यार्थ्यांमध्ये अंतराळ विज्ञानाबद्दल कुतूहल आणि जिज्ञासा निर्माण झाली. अशा कृतीशील व प्रयोगाधारित कार्यशाळांमधून विद्यार्थ्यांच्या वैज्ञानिक दृष्टिकोनाला चालना मिळून भविष्यातील शास्त्रज्ञ घडण्यास निश्चितच मदत होईल, असा विश्वास यावेळी व्यक्त करण्यात आला.

या उपक्रमाच्या यशस्वी आयोजनासाठी शाळेचे मुख्याध्यापक श्री. रोहिदास भारमळ तसेच सर्व पदाधिकाऱ्यांनी मार्गदर्शन केले. विज्ञान विभागातील शिक्षकांनी विशेष मेहनत घेतली.