IIT बॉम्बे हॉस्टेलमध्ये दुसऱ्या वर्षाच्या विद्यार्थ्याची आत्महत्या; मोबाईल चॅटमधून धक्कादायक खुलासा
देशातील अग्रगण्य अभियांत्रिकी संस्था इंडियन इन्स्टिट्यूट ऑफ टेक्नॉलॉजी (IIT) बॉम्बेमध्ये एका २० वर्षीय विद्यार्थ्याने आत्महत्या केल्याची दुःखद घटना समोर आली आहे.
Eduvarta
एज्युवार्ता न्यूज नेटवर्क
देशातील अग्रगण्य अभियांत्रिकी संस्था इंडियन इन्स्टिट्यूट ऑफ टेक्नॉलॉजी (IIT) बॉम्बेमध्ये एका २० वर्षीय विद्यार्थ्याने आत्महत्या (IIT Bombay suicide) केल्याची दुःखद घटना समोर आली आहे. पवई येथील संस्थेच्या हॉस्टेल क्रमांक ४ मधील खोली क्रमांक जी-४१४७ मध्ये पंख्याला गळफास (Hanging from the fan)घालून सोहिल राजकुमार (Sohil Rajkumar Sangwan) या विद्यार्थ्याचा मृतदेह आढळला. घटना २९ जुलैच्या रात्री घडली असून, हॉस्टेल परिसरात शोककळा पसरली आहे. मृत विद्यार्थी मटेरियल सायन्स (Materials Science Student) विभागात दुसऱ्या वर्षाचा विद्यार्थी होता.
सोहिल राजकुमार मूळचा राजस्थानातील पिलानी येथील रहिवासी होता. पवई पोलिसांनी घटनास्थळी भेट देऊन मृतदेह ताब्यात घेतला आणि कायदेशीर प्रक्रिया सुरू केली. प्राथमिक तपासात पोलिसांना विद्यार्थ्याच्या मोबाईल फोनमधील चॅट्स आणि रेकॉर्ड्समध्ये महत्त्वाचे संकेत मिळाले आहेत. त्यातून असे समोर आले की, तो काही काळापासून कौटुंबिक समस्यांमुळे आणि वैयक्तिक नातेसंबंधातील कठीण परिस्थितीमुळे मानसिक तणावात होता. पोलिसांनी त्याचा लॅपटॉप आणि इतर इलेक्ट्रॉनिक उपकरणांची देखील तपासणी सुरू केली आहे.
IIT बॉम्बेप्रमाणे उच्च शैक्षणिक दबाव असलेल्या संस्थांमध्ये विद्यार्थ्यांच्या मानसिक आरोग्याच्या समस्या वारंवार चर्चेत येतात. या घटनेने पुन्हा एकदा शैक्षणिक संस्थांमधील तणाव व्यवस्थापन, समुपदेशन सुविधा आणि विद्यार्थ्यांच्या मानसिक स्वास्थ्याकडे अधिक लक्ष देण्याची गरज अधोरेखित केली आहे. संस्थेतील विद्यार्थी आणि प्राध्यापक वर्ग या घटनेमुळे मोठ्या धक्क्यात आहे.
पोलिसांनी आत्महत्येमागील नेमकी कारणे शोधण्यासाठी सखोल तपास सुरू केला आहे. सध्या कोणतीही विशिष्ट व्यक्ती किंवा घटकावर संशय व्यक्त करण्यात आलेला नाही. या प्रकारच्या घटनांमुळे उच्च शिक्षण घेणाऱ्या विद्यार्थ्यांवर येणारा दबाव आणि त्यांच्या समस्या समजून घेण्याची गरज पुन्हा एकदा चर्चेत आली आहे. पालक आणि संस्थांनी विद्यार्थ्यांच्या मानसिक आरोग्याकडे गांभीर्याने लक्ष द्यावे, अशी अपेक्षा व्यक्त केली जात आहे.
