SPPU:पीएचडीच्या दुसऱ्या फेरीला सुरुवात; गाईडकडून रिक्त जागांची माहिती मागवली

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University)संलग्न विद्यापीठ परिसरातील तसेच पुणे, अहिल्यानगर व नाशिक जिल्ह्यातील संशोधन केंद्रांमधील पीएचडी प्रवेशासाठी दुसरी फेरी (Second round for PhD admission)लवकरच सुरू होणार आहे. विद्यापीठातर्फे दुसऱ्या फेरीसाठी संशोधक मार्गदर्शकांकडे (Researcher Guide)रिक्त असलेल्या जागांची माहिती येत्या 14 ऑगस्टपर्यंत स्वीकारली जाणार आहे. त्यानंतर पीएचडी प्रवेशाच्या दुसऱ्या फेरीतून पात्र विद्यार्थ्यांना प्रवेश दिले जाणार आहेत.

पुणे विद्यापीठातर्फे पीएचडी प्रवेशासाठी प्रवेश पूर्व परीक्षा घेण्यात आली. त्यातून पात्र विद्यार्थ्यांना पहिल्या फेरीतून प्रवेश देण्यात आले. परंतु,अनेक विद्यार्थ्यांना प्रवेश मिळाला नाही. त्यामुळे प्रवेशाची दुसरी फेरी केव्हा सुरू होणार याबाबत विद्यार्थी प्रतिक्षेत होते. मात्र, लवकरच पीएचडी प्रवेशाच्या प्रतीक्षेत असलेल्या विद्यार्थ्यांना प्रवेशाची संधी उपलब्ध होणार आहे.

विद्यापीठाने प्रसिध्द केलेल्या परिपत्रकानुसार संशोधन केंद्राने विषय मान्य करून घेणे आवश्यक आहे. संशोधन मार्गदर्शकांनी रिक्त जागांचा तपशील अद्यावत करणे व वेळेत प्रक्रिया पूर्ण झाल्याची खात्री करणे गरजेचे आहे. त्याचबरोबर संशोधन केंद्रांनी मार्गदर्शकांची request approve करून रिक्त जागांचा तपशील प्रवर्गनिहाय ऑनलाइन पद्धतीने जमा करून संकेतस्थळावर रिक्त जागा घोषित झाल्याची खात्री करणे गरजेचे आहे, असे विद्यापीठाचे उपकुलसचिव डॉ.मुंजाजी रासवे यांनी परिपत्रकाद्वारे स्पष्ट केले आहे.

--------------

सावित्रीबाई फुले पुणे विद्यापीठाच्या पीएचडी प्रवेश प्रक्रियेच्या दुसऱ्या फेरीची सुरूवात झाली आहे. पहिल्या टप्प्यात मार्गदर्शकांना आपल्या जागा अद्यावत करण्यासाठी मागदर्शक सुचना देण्यात आल्या आहेत. पहिल्या फेरीत जो गोंधळ झाला होता त्यात अनेक पात्र विद्यार्थ्यांना डावलून शिफारसीवर विद्यार्थी घेतले गेले.  तोच प्रकार पुन्हा दुसऱ्या फेरीत होऊ नये. पात्र व गरजू विद्यार्थ्यांना संधी मिळावी. 
 - राहुल ससाणे, अध्यक्ष, विद्यापीठ विद्यार्थी संघर्ष कृती समिती