पुण्यात स्कूल बस चालकाकडून शाळकरी मुलीशी अश्लील कृत्य

एज्युवार्ता न्यूज नेटवर्क 

पुण्यात शाळकरी मुलींवर होणाऱ्या लैंगिक घटनांचे सत्र सुरूच आहे. मागील आठवड्यात कर्वेनगर आणि कारेगाव  येथील शाळेत घडलेल्या लैंगिक अत्याचाराच्या घटनेमुळे (Sexual assault incidents) संपूर्ण राज्यात संतापाची लाट असतानाच आता आणखीन एक धक्कादायक प्रकार समोर आला आहे. विद्यार्थी वाहतूक करणाऱ्या स्कूल बस चालकाने (School bus driver) शाळकरी मुलीशी अश्लील कृत्य केल्याचा प्रकार उघडकीस आला. त्यानंतर बस चालकाच्या कोंढवा पोलिसांनी (Kondhawa Crime News) अटक केली आहे. मात्र, या घटनेच्या निमित्ताने शाळकरी मुला-मुलींवर होणाऱ्या अत्याचाराचा प्रश्न ऐरणीवर आला आहे.   

पोलिसांनी दिलेल्या माहितीनुसार, नववीत शिकणाऱ्या १५ वर्षीय मुलीच्या तक्रारीवरून कय्यूम अहमद पठाण (वय ३३, रा. विद्यानगर, कोंढवा खुर्द) या व्यक्तीला अटक करण्यात आली आहे. आरोपी पठाण शाळकरी मुला-मुलींना मिनी बसमधून नेहमीप्रमाणे ने-आण करायचा. बसमध्ये इतरही लहान मुले असतात. सदरील मुलगी नववीत असल्याने बसमधील मागील सीटवर बसायची. घटनेच्या दिवशी मुलगी शाळेतून निघाली. कात्रज-कोंढवा रस्त्यावर आरोपीने एका मुलाला सोडण्यासाठी बस थांबवली. मुलीने मुलाला खाली उतरवले. ती बसच्या दरवाजाजवळ थांबली होती. त्या वेळी आरोपीने तिच्याशी अश्लील कृत्य केले.

या घटनेनंतर घाबरलेली मुलगी बसमधील मागील आसनावर जाऊन बसली. घरी आल्यावर दोन दिवस तिने या घटनेची कोणाकडे देखील वाच्यता केली नाही.   याचाच फायदा घेत आरोपीने पुन्हा अश्लील कृत्य करण्याचा प्रयत्न केला. अखेर घाबरलेल्या मुलीने या घटनेची माहिती कुटुंबीयांना दिली. कोंढवा पोलिसांनी पठाणला अटक केली असून बालकांचे लैंगिक अत्याचारांपासून संरक्षण कायद्यान्वये (पोक्सो) गुन्हा दाखल करण्यात आला असून पुढील तपास सुरू आहे. 

कर्वेनगर भागातील एका शाळेत नृत्यशिक्षकाने मुलांशी अश्लील कृत्य केल्याची घटना नुकतीच घडली होती. याप्रकरणी त्याला अटकही झाली होती. तसेच, निष्काळजीपणाचा ठपका ठेवून वारजे माळवाडी पोलिसांनी संस्थाचालकालाही अटक केली होती. तर कारेगाव जिल्हा परिषद शाळेतील एका शिक्षकाने काही अल्पवयीन मुलींची छेडछाड आणि मनास लज्जा उत्पन्न होईल,असे कृत्य केल्याप्रकरणी बाल लैंगिक अत्याचाराच्या गुन्ह्याखाली आरोपी शिक्षकाला अटक करण्यात आली आहे.