RTE प्रवेश प्रक्रियेला सुरूवात; शुक्रवारपासून शाळा नोंदणी

एज्युवार्ता न्यूज नेटवर्क 

आरटीई प्रवेशाची वाट पाहणाऱ्या पालकांसाठी महत्त्वाची बातमी आहे. राज्याच्या शालेय शिक्षण विभागातर्फे राबविल्या जाणाऱ्या आरटीई प्रवेश प्रक्रियेस सुरुवात झाली आहे. येत्या 9 जानेवारी ते 19 जानेवारी या कालावधीत शाळा नोंदणी व व्हेरिफिकेशनची कार्यवाही पूर्ण करावी लागणार आहे. त्यानंतर पुढील प्रक्रिया सुरू केली जाणार आहे.

राज्याच्या शालेय शिक्षण विभागातर्फे शिक्षण हक्क कायद्याअंतर्गत 25% आरक्षित जागांवर ऑनलाइन पद्धतीने आरटीई प्रवेश प्रक्रिया राबवली जाते. राज्याच्या प्राथमिक शिक्षण संचालक कार्यालयातर्फे या संदर्भातील परिपत्रक प्रसिद्ध करण्यात आला आहे. त्यानुसार २०२६-२७ या शैक्षणिक वर्षासाठी आरटीई २५ टक्के प्रवेश प्रक्रिया सुरु करण्याच्या अनुषंगाने  ९ जानेवारी पासून विनाअनुदानित व स्वयंअर्थसहाय्यित शाळा नोंदणी (School Registration) आणि शाळा व्हेरिफिकेशन ची लिंक सुरु करण्यात आली आहे.

शाळा नोंदणीनंतरचा अत्यंत महत्वाचा टप्पा शाळा व्हेरिफिकेशन असतो. तरी या अनुषंगाने सर्व संबंधितांनी शाळा व्हेरिफिकेशन करताना, बंद करण्यात आलेल्या शाळा, अल्पसंख्याक दर्जा प्राप्त शाळा, अनधिकृत शाळा तसेच स्थलांतरीत झालेल्या शाळा आरटीई २५ टक्के प्रवेश सन २०२६-२७ मध्ये प्रविष्ट होणार नाहीत याची खबरदारी घेण्यात यावी. याबाबत सर्वस्वी जबाबदारी शिक्षणाधिकारी (प्राथमिक) यांचेवर निश्चित करण्यात येईल याची नोंद घ्यावी.

तसेच शाळा मान्यता ज्या मंडळाची आहे तेच मंडळ शाळेने नोंदणी करताना निवडले आहे का याची खात्री करण्यात यावी. (उदा. शाळा मान्यता राज्य मंडळाची आहे व शाळेने नोंदणी करताना केंद्रीय मंडळ निवडले आहे.) तरी उपरोक्त सूचनांचे पालन करुन दिलेल्या कालावधीमध्ये  ९ जानेवारी ते  १९ जानेवारी २०२६ या कालावधीत विनाअनुदानित व स्वयंअर्थसहाय्यित शाळा नोंदणी व शाळा व्हेरिफिकेशनची कार्यवाही पूर्ण करावी, अशा सूचना राज्याचे प्राथमिक शिक्षण संचालक शरद गोसावी यांनी दिल्या आहेत.