विद्यापीठाची पीएच.डी प्रवेश पूर्व परीक्षा (पेट) फेब्रुवारी महिन्यात
पीएच.डी.प्रवेश पूर्व परीक्षा घेण्याच्या निर्णयास शनिवारी विद्यापीठाच्या व्यवस्थापन परिषदेच्या बैठकीत मान्यता
eduvarta@gmail.com 
एज्यूवार्ता न्यूज नेटवर्क
सावित्रीबाई फुले पुणे विद्यापीठाच्या (Savitribai Phule Pune University)पीएच.डी.प्रवेशची वाट पाहणाऱ्या विद्यार्थ्यांची प्रतीक्षा संपली असून येत्या फेब्रुवारी महिन्यात पीएच.डी.प्रवेश पूर्व परीक्षा (Ph.D Pet Exam) घेण्याच्या निर्णयास शनिवारी विद्यापीठाच्या व्यवस्थापन परिषदेच्या (Management Council of the University) बैठकीत मान्यता देण्यात आली.त्यामुळे पुणे,अहमदनगर व नाशिक (Pune, Ahmednagar and Nashik) जिलह्यातील संशोधन केंद्रात विद्यार्थ्यांना पीएच.डी.प्रवेशाची संधी लवकरच प्राप्त होणार आहे.
सावित्रीबाई फुले पुणे विद्यापीठाचे कुलगुरू डॉ.सुरेश गोसावी यांच्या अध्यक्षतेखाली शनिवारी व्यवस्थापन परिषदेची बैठक घेण्यात आली.या बैठकीस विद्यापीठचे प्र-कुलगुरू डॉ. पराग काळकर, प्रभारी कुलसचिव डॉ.विजय खरे, व्यवस्थापन परिषद सदस्य राजेंद्र विखे-पाटील ,डॉ. देविदास वायदंडे, डी.बी. पवार, सागर वैद्य, बागेश्री मंठाळकर आदी उपस्थित होते.
हेही वाचा : कॉमर्सच्या विद्यार्थ्यांसाठी गुड न्यूज ; नागरी सहकारी बँकेत इंटर्नशिपची संधी
दरम्यान, पुणे विद्यापीठाची पीएच.डी प्रवेश प्रक्रिया केव्हा सुरू होणार याबाबत विद्यार्थ्यांमध्ये उत्सुकता होती. मात्र, विद्यापीठ अनुदान आयोगाच्या नवीन नियमावलीनुसार पीएच.डी.प्रवेश प्रक्रिया राबवण्यासाठी आवश्यक तयारी केली जात होती. यापुढील काळात ज्या ठिकाणी रिसर्च सेंटर आहे, त्याचा ठिकाणच्या रिसर्च गाईडला पीएच.डी.साठी विद्यार्थी घेता येणार आहेत.त्यामुळे पुढील काळात पीएच.प्रवेशाच्या जागा काही प्रमाणात कमी होणार आहेत.
विद्यापीठातर्फे नोव्हेंबर 2022 मध्ये पीएच.डी. प्रवेश प्रक्रिया राबवण्यात आली होती.त्यानंतर वर्षभरानंतर प्रवेश प्रक्रिया राबवली जाणार आहे. विद्यापीठातर्फे पीएच.डी.प्रवेशासाठी ऑनालाईन प्रवेश पूर्व परीक्षा येत्या फेब्रुवारी महिना अखेरीस होण्याची शक्यता आहे. तसेच जानेवारी महिन्याच्या पहिल्या किंवा दुसऱ्या आठवड्यात याबाबत जाहिरात प्रसिद्ध करून विद्यार्थ्यांकडून ऑनालाईन अर्ज मागवले जाण्याची शक्यता आहे. विद्यार्थ्यांना अर्ज करण्यासाठी एक महिन्यांचा कालावधी दिला जाणार आहे.त्यामुळे पीएच.डी.साठी प्रवेश घेऊ इच्छिणाऱ्या विद्यार्थ्यांना तयारीसाठी आता कमी कालावधी उरला आहे.
--------------------------------------------------
