नागपूर येथील विद्यापीठाच्या कुलगुरूचे अपघाती निधन;पत्नीचाही मृत्यू; विद्यापीठावर शोककळा

एज्युवार्ता न्यूज नेटवर्क 

कवी कुलगुरू कालिदास संस्कृत विद्यापीठाचे कुलगुरू प्रा.हरेराम त्रिपाठी यांचे अपघाती निधन झाल्याची धक्कादायक माहिती समोर आली आहे. शनिवारी पहाटे उत्तर प्रदेश येथील कुशीनगर मधील मऊ परिसरात त्यांच्या गाडीला अपघात झाला. त्रिपाठी हे आपल्या कुटुंबासह त्यांच्या मूळ गावी जात होते. गावी जात असताना त्रिपाठी यांच्यासह त्यांच्या पत्नीचाही अपघाती मृत्यू झाला. त्रिपाठी यांच्या निधनाने विद्यापीठावर शोककळा पसरली आहे.

संस्कृत साहित्यातील मोठे विद्वान आणि संस्कृतचे गाढे अभ्यासक अशी हरेराम त्रिपाठी यांची ओळख होती. हरेराम त्रिपाठी यांचा जन्म उत्तर प्रदेशातील देवरिया येथे झाला. त्यांचे प्राथमिक शिक्षणही देवरिया येथेच झाले.1986 मध्ये ते संस्कृतचा अभ्यास करण्यासाठी बनारस येथे गेले. त्यांनी रामाचार्य संस्कृत विद्यापीठातून उत्तर माध्यम परीक्षा उत्तीर्ण केली. तसेच पुढे त्यांनी संपूर्णानंद संस्कृत विद्यापीठातून त्रिपाठी यांनी शास्त्री पदवी,आचार्य पदवी आणि पीएचडी पर्यंतचे शिक्षण घेतले. 1993 मध्ये जम्मू येथील राष्ट्रीय संस्कृत संस्थान येथे संशोधन सहाय्यक म्हणून त्यांच्या कारकिर्दीला सुरुवात झाली. पुढे त्यांची श्री लाल बहादुर शास्त्री राष्ट्रीय संस्कृत विद्यापीठात तत्त्वज्ञान विभागात नियुक्ती झाली.

संस्कृत साहित्य आणि तत्वज्ञान क्षेत्रातील त्यांच्या योगदानाबद्दल त्यांना अनेक पुरस्काराने सन्मानित करण्यात आले. उत्तर प्रदेश येथील संस्कृत संस्थेकडून महर्षी बद्रायन राष्ट्रपती पुरस्कार त्यांना देण्यात आला. तसेच शंकर वेदांत, पाणिनी आणि इतर क्षेत्रातील विशिष्ट पुरस्काराने त्यांना सन्मानित करण्यात आले. त्यांनी आत्तापर्यंत 30 हून अधिक पुस्तकांचे लेखन आणि संपादन केले आहे. 

 कालिदास संस्कृत विद्यापीठात त्यांनी अनेक शैक्षणिक व सांस्कृतिक उपक्रम राबविले. त्यांच्या निधनामुळे कालिदास विद्यापीठाचे मोठे नुकसान झाल्याचे मानले जात आहे. त्रिपाठी यांच्या जाण्याने संपूर्ण  साहित्य क्षेत्रातून हळहळ व्यक्त केली जात आहे. पोलीस अपघाताबाबत तपास करत आहेत.