NCERTला अभिमत विद्यापीठाचा दर्जा, डिप्लोमा, पदवी, पदव्युत्तर आणि डॉक्टरेट अभ्यासक्रम उपलब्ध
यूजीसी कायदा, १९५६ च्या कलम ३ अंतर्गत, केंद्र सरकारला यूजीसीच्या सल्ल्यानुसार कोणत्याही शैक्षणिक संस्थेला अभिमत विद्यापीठाचा दर्जा देण्याचा अधिकार आहे, असे शिक्षण मंत्रालयाने म्हटले आहे.
eduvarta@gmail.com 
एज्युवार्त न्यूज नेटवर्क
केंद्रीय शिक्षण मंत्रालयाने (Union Ministry of Education) एक अधिकृत अधिसूचना जारी करून, राष्ट्रीय शैक्षणिक संशोधन आणि प्रशिक्षण परिषदेला (NCERT) अभिमत विद्यापीठाचा दर्जा (Deemed University Status) दिला आहे. नवीन अधिसूचनेनुसार, एनसीईआरटी आता विद्यार्थ्यांना डिप्लोमा, पदवी, पदव्युत्तर आणि डॉक्टरेट (Diploma Postgraduate and Doctoral Programs) कार्यक्रमांसारखे अभ्यासक्रम उपलब्ध करून देईल. शिक्षण आणि शैक्षणिक संशोधन प्रयत्नांना बळकटी देण्यासाठी राष्ट्रीय शिक्षण धोरण (NEP) २०२० अंतर्गत हे महत्त्वपूर्ण पाऊल उचलले जात असल्याचे सांगण्यात आले आहे.
यूजीसी कायदा, १९५६ च्या कलम ३ अंतर्गत, केंद्र सरकारला यूजीसीच्या सल्ल्यानुसार कोणत्याही शैक्षणिक संस्थेला अभिमत विद्यापीठाचा दर्जा देण्याचा अधिकार आहे, असे शिक्षण मंत्रालयाने म्हटले आहे.
एनसीईआरटीने यूजीसी कायदा, १९५६ च्या कलम ३ अंतर्गत अभिमत विद्यापीठाच्या दर्जासाठी अर्ज केला होता. त्यानंतर यूजीसीने एनसीईआरटीच्या अर्जाची तपासणी केली आणि २०२३ मध्ये, काही अटी व शर्तींच्या अधीन राहून, इरादापत्र जारी केले. या इरादापत्रानुसार, यूजीसीने एनसीईआरटीला तीन वर्षांच्या आत सर्व अटींची पूर्तता करणे बंधनकारक केले. सर्व अटींची पूर्तता केल्यानंतर आता एनसीईआरटीला अभिमत विद्यापीठाचा दर्जा देण्यात आला आहे.
अभिमत विद्यापीठ बनल्यानंतर, एनसीईआरटीने सुरू केलेले सर्व डिप्लोमा, पदवी, पदव्युत्तर आणि डॉक्टरेट अभ्यासक्रम यूजीसीच्या नियमांनुसार चालवणे बंधनकारक आहे. तसेच, अभ्यासक्रम, प्रवेश प्रक्रिया, जागांची संख्या आणि शुल्क यासंबंधीच्या सर्व नियमांचे पालन करणे एनसीईआरटीसाठी अनिवार्य असल्याचे नमूद करण्यात आले आहे.
