सोलापूर विद्यापीठाकडून उन्हाळी सत्राचे वेळापत्रक जाहीर, 'या' तारखेपासून परीक्षा सुरू

एज्युवार्ता न्यूज नेटवर्क

पुण्यश्लोक अहिल्यादेवी होळकर सोलापूर विद्यापीठाच्या (Punyashloka Ahilyadevi Holkar Solapur University) परीक्षांचे वेळापत्रक निश्चित (Exam schedule fixed) झाले असून, त्या २ एप्रिल २०२६ पासून सुरु होणार आहेत. बोर्ड ऑफ एक्झामिनेशन अँड इव्हॅल्युएशन (बीओएई) च्या बैठकीत हा निर्णय घेण्यात आला असून, विविध अभ्यासक्रमांच्या परीक्षांचे वेळापत्रक जाहीर (Schedule announced) करण्यात आले आहे.

विद्यापीठाच्या वतीने पदवी, पदव्युत्तर आणि अभियांत्रिकीसह विविध अभ्यासक्रमांच्या परीक्षा घेण्यात येणार आहेत. या परीक्षा तीन सत्रांमध्ये होणार असून सकाळी ९ ते १२, दुपारी १२ ते ३ आणि दुपारी ३ ते सायंकाळी ६ या वेळेत परीक्षा होणार आहेत. पदवीच्या विद्यार्थ्यांच्या परीक्षा त्यांच्या संबंधित महाविद्यालयांत होणार आहेत, तर पदव्युत्तर आणि अभियांत्रिकीच्या विद्यार्थ्यांच्या परीक्षा विविध परीक्षा केंद्रांवर घेतल्या जाणार आहेत. 

हेही वाचा - ICAI कडून जानेवारी परीक्षेचा निकाल १ मार्च रोजी जाहीर केला जाणार

परीक्षेसाठी एकूण १०९ केंद्रांची नियुक्ती करण्यात आली आहे. बी.ए., बी. कॉम., बी.एस्सी., एम.ए., एम.एस्सी., एम.कॉम., एलएलबी तसेच अभियांत्रिकीसह एकूण २८४ अभ्यासक्रमांच्या परीक्षा घेण्यात येणार आहेत. या परीक्षा २ एप्रिल २०२६ मे २०२६ अखेरपर्यंत चालणार आहेत.

परीक्षा पूर्ण झाल्यानंतर तात्काळ निकाल जाहीर करण्यासाठी परीक्षा विभागाने नियोजन केले आहे. परीक्षा, वेळापत्रक आणि उत्तरपत्रिका तपासणीचे योग्य नियोजन करण्यात आले असून, या परीक्षा काळात जिल्ह्यातील सुमारे ७९ हजार विद्यार्थी परीक्षेला बसणार आहेत

कॉपीमुक्त परीक्षा पार पाडण्यासाठी परीक्षा केंद्र असलेल्या महाविद्यालयांच्या प्राचार्यांना विद्यापीठाने पत्र पाठवून वर्गामध्ये सीसीटीव्ही कॅमेरे बसवण्याच्या सूचना दिल्या आहेत. तसेच कॉपीला आळा घालण्यासाठी विद्यापीठाकडून तीन भरारी पथकांची नियुक्ती करण्यात आली असून, ही पथके कोणत्याही वेळी परीक्षा केंद्रांना भेट देऊन पाहणी करणार आहेत.