'एमपीएससी'चा निकाल जाहीर, उमेदवारांचा प्रवर्गनिहाय  कट-ऑफ प्रसिद्ध

एज्युवार्ता न्यूज नेटवर्क 

गेली काही दिवस निकालाची वाट पाहणाऱ्या एमपीएससी उमेदवारांसाठी महत्त्वाची अपडेट समोर आली आहे. महाराष्ट्र लोकसेवा आयोगाने (MPSC) महाराष्ट्र नागरी सेवा राजपत्रित संयुक्त पूर्व परीक्षा-२०२५ चा (Combined Pre-Examination-2025) निकाल जाहीर झाला आहे. मुख्य परीक्षेसाठी पात्र ठरलेल्या उमेदवारांची यादी प्रसिद्ध करण्यात आली आहे. यंदा कट-ऑफ विक्रमी (Category wise cut-off) लागल्याने परीक्षेतील स्पर्धा वाढल्याचे दिसून येत आहे. त्यावेळी हा निकाल जाहीर (Results announced) करण्यासाठी आयोगाने बराच वेळ घेतला आहे. तब्बल साडे तीन महिन्यांपेक्षा जास्त काळानंतर हा निकाल जाहीर करण्यात आला आहे. 

एसपीएससी आयोगाने ९ नोव्हेंबर २०२५ रोजी घेण्यात आलेल्या महाराष्ट्र राजपत्रित नागरी सेवा संयुक्त पूर्व परीक्षा-२०२५ (राज्य सेवा गट-अ व गट-ब) चा निकाल आयोगाच्या संकेतस्थळावर आज शुक्रवारी २७ फेब्रुवारी रोजी जाहीर करण्यात आला. या पूर्व परीक्षेतून मुख्य परीक्षेसाठी पात्र ठरलेल्या उमेदवारांच्या बैठक क्रमांकासह नावांची यादी आणि गुणांची सीमारेषा (कट-ऑफ) आयोगाच्या https://mpsc.gov.in या संकेतस्थळावर प्रसिद्ध करण्यात आली आहे.

उमेदवारांचा प्रवर्गनिहाय कट-ऑफ

एमपीएससी आयोगाकडून उमेदवारांचा प्रवर्गनिहाय कट-ऑफ जाहीर केला आहे. सामान्य प्रवर्गासाठी पुरुषांचा कट ऑफ ११६ गुण, तर महिलांचा १११ गुण आहे. एससी प्रवर्गात पुरुषांचा कट-ऑफ १०९ गुण आणि महिलांचा १०४ गुण आहे. एसटी प्रवर्गात पुरुषांसाठी ९९ गुण, तर महिलांसाठी ९४ गुण कट-ऑफ निश्चित करण्यात आला आहे. इतर मागासवर्गीय (ओबीसी) प्रवर्गात पुरुषांचा कट-ऑफ ११६ गुण असून महिलांचा १११ गुण आहे. ईडब्ल्यूएस (EWS) प्रवर्गात पुरुषांचा कट-ऑफ १०३ गुण, तर महिलांचा ९९.५० गुण आहे. तसेच एसईबीसी प्रवर्गात पुरुषांसाठी ११६ गुण आणि महिलांसाठी १११ गुण असा कट-ऑफ जाहीर करण्यात आला आहे.