वरिष्ठ व निवड वेतनश्रेणी प्रशिक्षणास मुकलेल्या शिक्षकांची व्यवस्था करा;राहुल रेखावार यांना पत्र

एज्युवार्ता न्यूज नेटवर्क 

वरिष्ठ व निवड वेतन श्रेणीस (Senior and selected pay scale) पात्र ठरण्यासाठी पूर्ण करावयाच्या प्रशिक्षणास आपल्या अमानवी, अशैक्षणिक आणि अनैतिक धोरणांमुळे राज्यभर शिक्षकांमध्ये आपणाविरूद्ध संतापाची लाट उसळली आहे. त्यामुळे,  प्रशिक्षणास मुकाव्या लागणाऱ्या शिक्षकांसाठी तात्काळ ऑनलाइन प्रशिक्षणाची (Online training of teachers) व्यवस्था करावी, अन्यथा तीव्र आंदोलन करू असा इशारा मुंबई शिक्षक मतदार संघाचे आमदार ज.मो.अभ्यंकर (J.M.Abhyankar) यांनी राज्य शैक्षणिक संशोधन व प्रशिक्षण परिषदेचे संचालक राहूल रेखावार (Rahul Rekhavar) यांना पत्राद्वारे दिला आहे.  

शिक्षकांना उन्हाळयाच्या सुट्टीपूर्वी पूर्वकल्पना न देता आपण अत्यंत गैरसोईचा कालावधी निवडल्यामुळे शिक्षकांना आपले पूर्व नियोजित कार्यक्रम रद्द करून प्रशिक्षणास उपस्थित राहणे भाग पडले. प्रशिक्षण काळात शिस्तीच्या नावाखाली प्रशिक्षण केंद्रात दाखल होण्याची परवानगी दिल्यानंतर नवीन केंद्रावर पोहचण्यास १० - १५ मिनिटे विलंब झालेल्यांना आपण घरचा रस्ता दाखविला. तातडीच्या औषधोपचारासाठी बाहेर पडलेल्या शिक्षकांचा तास अर्धा तास क्षमापित न करता त्यांना प्रशिक्षण केंद्राबाहेर काढले. कहर म्हणजे स्वच्छता गृहातून परत येण्यास थोडा अधिकचा कालावधी लागल्यामुळे अशा शिक्षकांना सुध्दा घरी पाठविले. अशाप्रकारे आपल्या हिटलरी शिस्तीचा तडाखा अनेक शिक्षकांना बसल्यामुळे बऱ्याच दिवसानंतर प्राप्त झालेली श्रेणी पात्रता संपादन करण्याची संधी शिक्षकांना गमवावी लागली. त्यामुळे प्रशिक्षापासून वंचित राहिलेल्या शिक्षकांसाठी तात्काळ प्रशिक्षणाची व्यवस्था करावी, असे अभ्यंकर यांनी पत्रात नमूद केले आहे. 

प्रमुख मागण्या - 

काही मिनिटांच्या अनुपस्थितीमुळे प्रशिक्षणास मुकाव्या लागणाऱ्या शिक्षकांसाठी तात्काळ ऑन लाईन प्रशिक्षणाची व्यवस्था करावी. नजीकच्या काळात सेवानिवृत्त होणाऱ्या शिक्षकांचे प्रशिक्षण त्यांच्या सेवानिवृत्ती दिनांकापुर्वी आयोजित केल्या जात नसल्यास त्यांनी पूर्ण केलेल्या प्रशिक्षण कालावधीच्या आधारे त्यांना Deemed Completed समजून प्रमाणपत्र द्यावे जेणेकरून त्यांना निवडश्रेणीचा लाभ घेऊन सेवानिवृत्तीन्तोर वेतनवृध्दीचा फायदा घेता येईल. यापुढील प्रशिक्षण आयोजित करताना प्रशिक्षणास उपस्थित शिक्षकाच्या एखाद्या दिवशीच्या विलंबाची कारणे तपासून निर्णय घेण्याकरिता विभागाच्या अधिकाऱ्यास प्राधिकृत करावे. प्रशिक्षण कालावधीची बदली रजा अनुज्ञेय ठरवावी, मागण्यांवर कार्यवाही न झाल्यास राज्य शिक्षक सेनेला आपल्या विरोधात तीव्र आंदोलन करावे लागेल, असा इशारा आमदार ज.मो.अभ्यंकर यांनी दिली आहे.