MPSC 2024 : संयुक्त पुर्व परीक्षेसाठी आयोगाकडून हॉल तिकीटासह महत्त्वाच्या सूचना प्रसिद्ध.. 

एज्युवार्ता न्यूज नेटवर्क 

महाराष्ट्र लोकसेवा आयोगामार्फत (MPSC) रविवार दि. 25 ऑगस्ट रोजी नियोजित महाराष्ट्र राजपत्रित नागरी सेवा संयुक्त पूर्व परीक्षाचे (Maharashtra Gazetted Civil Services Joint Prelims Exam) हॉल तिकीट (Admit cards released) आयोगाचे अधिकृत संकेतस्थळ mpsconline.gov.in वर उमेदवारांच्या अकाऊंट मध्ये उपलब्ध करून दिली आहेत. राज्य सरकारच्या विविध विभागातील 524 रिक्त पदे भरण्यासाठी महाराष्ट्र लोकसेवा आयोगातर्फे राजपत्रित नागरी सेवा संयुक्त पूर्व परीक्षा 25 ऑगस्ट रोजी घेण्यात येणार्‍या परीक्षेसाठी आयोगाकडून उमेदवारांना काही महत्त्वाच्या सूचना (Important Instructions) दिल्या आहेत. 

यापुर्वी ही परीक्षा २८ एप्रिल रोजी घेण्याची घोषणा करण्यात आली होती. मात्र, सरकारने फेब्रुवारी महिन्यात मराठा समाजासाठी १० टक्के आरक्षण लाग केले. त्यानुसार शासकीय सेवेतील विविध पदांवरील नियुक्तीकरीता सामाजिक आणि शैक्षणिकदृष्ट्या मागास वर्गाचे आरक्षण लागू करण्यात आले आहे. तसेच आयोगाने नव्या आरक्षणाप्रमाणे जागा निश्चित करून पुन्हा नव्याने प्रस्ताव पाठविण्याची सूचना राज्य सरकारला केली. त्यामुळे २१ मार्चच्या सूचनेनुसार २८ एप्रिल रोजी होणारी परीक्षा पुढे ढकलली आहे. राज्य सरकारने आता सुधारित ५२४ पदांचा प्रस्ताव आयोगाला पाठविला असून त्यानुसार ही पदे भरण्यासाठी २५ ऑगस्ट रोजी परीक्षा घेण्यात येणार असल्याचे आयोगाने स्पष्ट केले आहे.

याव्यतिरिक्त आयोगाकडून काही महत्त्वाच्या सूचना देण्यात आल्या आहेत. त्या अशा की, हॉल तिकीट सोबत आणणे अनिवार्य आहे. त्याशिवाय परीक्षेस प्रवेश दिला जाणार नाही. परीक्षेच्या दिवशी ऐनवेळी उद्भवू शकणाऱ्या अडचणी अथवा आंदोलने, मोचे, वाहतूक समस्या, अतिवृष्टी इत्यादी बाबी लक्षात घेऊन, परीक्षा सुरू होण्याच्या वेळेपूर्वी किमान दीड तास अगोदर संबंधित परीक्षा उपकेंद्रावर उपस्थित राहणे आवश्यक आहे. प्रत्यक्ष परीक्षा सुरू होण्याच्या वेळेपूर्वी एक तास अगोदर परीक्षा कक्षातील स्वतः च्या बैठक क्रमांकावर उपस्थित राहणे अनिवार्य आहे. 

परीक्षा कक्षातील अंतिम प्रवेशासाठी विहित केलेल्या वेळेनंतर कोणत्याही परिस्थितीत उमेदवारांना परीक्षा कक्षामध्ये प्रवेश दिला जाणार नाही. अथवा यासंदर्भात आयोगाची कोणत्याही प्रकारची जबाबदारी राहणार नाही. आयोगाच्या संकेतस्थळावरील उमेदवारांना सर्वसाधारण सूचना,हॉल तिकीटावरील सूचना उपलब्ध आहेत. आयोगाकडून वेळोवेळी देण्यात आलेल्या सूचनांचे उल्लंघन करणाऱ्या उमेदवारांवर आयोगाच्या स्वेच्छाधिकारानुसार ठराविक कालावधीसाठी अथवा कायमस्वरुपी प्रतिरोधनाची तसेच, प्रचलित नियम / कायद्यातील तरतुदीनुसार कारवाई करण्यात येईल. प्रवेश प्रमाणपत्र मिळविण्यात कोणतीही अडचण उद्भवल्यास उमेदवारास आयोगाकडे संपर्क करता येणार आहे. यांसारख्या काही सूचना देण्यात आल्या आहेत.