कृषीच्या पदांचा प्रश्न मार्गी,  संयुक्त पूर्व परीक्षा १ डिसेंबरला.. 

एज्युवार्ता न्यूज नेटवर्क 

आयबीपीएस क्लर्क आणि एमपीएससी या दोन्ही परीक्षा एकाच दिवशी आल्याने महाराष्ट्र लोकसेवा आयोगाकडून (MPSC) एमपीएससी परीक्षा पुढे ढकलण्याचा निर्णय घेण्यात आला. तेव्हापासून प्रतीक्षीत असलेल्या संयुक्त पूर्व परीक्षेची तारीख जाहीर करण्यात आली आहे. एमपीएससीने दिलेल्या माहितीनुसार महाराष्ट्र नागरी सेवा राजपत्रित संयुक्त पूर्व परीक्षा (Civil Services Gazetted Combined Preliminary Examination) येत्या १ डिसेंबर रोजी आयोजित करण्यात येणार आहे. तसेच उमेदवारांच्या मागणी प्रमाणे कृषी सेवेच्या २५८ पदांचा (258 Posts of Agriculture Service) समावेश याच परीक्षेत करण्यात येणार असल्यामुळे तो पण प्रश्न मार्गी लागला आहे.  

एमपीएससीने दिलेल्या माहितीनुसार, २९ डिसेंबर, २०२३ रोजी विविध संवर्गाच्या एकूण २७४ रिक्त पदांकरीता जाहिरात प्रसिद्ध करण्यात आली. राज्यातील सामाजिक व शैक्षणिकदृष्ट्या मागासवर्गाकरीता आरक्षित पदसंख्या नमूद करून एकूण ५२४ पदांचे शुद्धिपत्रक ८ मे २०२४ रोजी प्रसिद्ध करण्यात आले. ही जाहिरात प्रसिद्ध केल्यानंतर कृषि विभागाने १६ ऑगस्ट रोजी महाराष्ट्र कृषी सेवा २०२४ साठीच्या २५८ पदांचे मागणीपत्र आयोगाला दिले. या पदांचा समावेश महाराष्ट्र नागरी सेवा राजपत्रित संयुक्त पूर्व परीक्षा २०२४ मध्ये करण्याबाबत शासनाकडून विनंती करण्यात आली. या अनुषंगाने आयोगाची २३ सप्टेंबर, २०२४ रोजी बैठक झाली. महाराष्ट्र कृषि सेवेतील पदांचा समावेश महाराष्ट्र नागरी सेवा राजपत्रित संयुक्त पूर्व परीक्षा २०२४ मध्ये करण्याचा निर्णय घेण्यात आला.

कृषि सेवेतील पदांचा तपशील आणि शैक्षणिक पात्रतेनुसार अर्ज सादर करण्याबाबतचे शुद्धिपत्रक लवकरच आयोगाच्या संकेतस्थळावर प्रसिद्ध करण्यात येईल. त्यानंतर उमेदवारांना अर्ज सादर करण्यासाठी २१ दिवसांचा कालावधी देण्यात येईल. अर्ज कालावधी, नव्याने अर्ज करणाऱ्या उमेदवारांची संख्या विचारात घेऊन प्रश्नपत्रिका व उत्तरपत्रिका छपाईचा कालावधी, ऑक्टोबरमध्येमध्ये आयोजित इतर संस्थेच्या भरतीप्रक्रिये संदर्भात विविध परीक्षांचे वेळापत्रक, आगामी विधानसभा निवडणुकीची आचार संहिता व निवडणुकीचा अंदाजित कार्यक्रम इत्यादी बाबी विचारात घेऊन महाराष्ट्र नागरी सेवा राजपत्रित संयुक्त पूर्व परीक्षा २०२४ ही परीक्षा १ डिसेंबर रोजी आयोजित करण्यात येणार आहे.