एमबीबीएसच्या वाढीव ८०० जागांचा समावेश तिसऱ्या फेरीत; सीईटी सेलची माहिती 

एज्युवार्ता न्यूज नेटवर्क 

महाराष्ट्र राज्य सामाईक परीक्षा (Maharashtra State Common Examination) कक्षातर्फे वैद्यकीय (MBBS) प्रवेशाच्या (MBBS  admission process) फेऱ्या सुरू आहेl. त्यातच आता केंद्रीय आरोग्य मंत्रालयाने राज्यातील ८ वैद्यकीय महाविद्यालयांना मंजूरी दिली. त्यामुळे राज्यातील शासकिय एमबीबीएस प्रवेशाच्या ८०० जागा वाढल्या (MBBS admission increased by 800 seats) आहेत. या वाढीव ८०० जागांचा समावेश तिसऱ्या फेरीत (Additional 800 seats included in the third round) करण्यात येणार असल्याची माहिती सीईटी सेलकडून देण्यात आली आहे. त्यामुळे वैद्यकीय शिक्षणासाठी प्रवेश घेऊ इच्छिणाऱ्या विद्यार्थ्यांचा मार्ग सुकर झाला आहे. 

दुसऱ्या फेरीसाठी विद्यार्थ्यांनी यापूर्वीच महाविद्यालयांसाठी पसंतीक्रम नोंदवले आहेत. दुसऱ्या फेरीसाठी गुणवत्ता यादी देखील प्रसिद्ध करण्यात आली आहे. त्यामुळे दुसऱ्या फेरीत या नव्या वैद्यकीय महाविद्यालयाचा समावेश केला असता तर प्रवेश प्रक्रियेला विलंब झाला असता. सीईटी सेलकडून तिसऱ्या फेरीसाठी विद्यार्थ्यांच्या नोंदणीला ९ ऑक्टोबरपासून सुरुवात केली जाणार आहे. तसेच या फेरीसाठी उपलब्ध जागा १५ ऑक्टोबरला जाहीर होणार आहेत. त्यामुळे नव्या कॉलेजांना सर्व परवानग्या प्राप्त करून १५ ऑक्टोबरपूर्वी प्रवेश प्रक्रियेत समावेश करावा लागणार आहे, असेही सीईटी सेलकडून सांगण्यात आले आहे. 

सीईटी सेलकडून एमबीबीएसच्या दुसऱ्या फेरीची प्रवेश प्रक्रिया सुरू आहे. विद्यार्थ्यांना ६ ऑक्टोबरपर्यंत कॉलेजमध्ये जाऊन प्रवेश निश्चित करता येणार आहेत. सरकारी प्रवेशासाठी पहिल्या फेरीत खुल्या प्रवर्गाचा कटऑफ यंदा ६४२ गुणांपर्यंत वधारला आहे. त्यातून एमबीबीएसच्या प्रवेशासाठी यंदा चांगलीच चुरस असून दुसऱ्या फेरीचा कटऑफही अधिक आहे. त्यामुळे चिंतेत असलेल्या विद्यार्थ्यांसाठी वाढीव ८०० जागा या दिलासा देणाऱ्या आहेत.