कलेच्या उपासकाने अविरत कष्ट घेऊन निर्माण केली रत्नांची खाण 

आदर्श कला शिक्षक : शीलरतन बंगाळे 

विद्यार्थ्यांमधील सुप्त कलागुण ओळखून त्यांच्या आयुष्याला दिशा देण्याचे उत्तम काम सरांनी केले.विद्यार्थ्यांना एलिमेंटरी , इंटरमिजिएट आणि अनेक चित्रकलेच्या बाह्य परीक्षांना  बसवून त्यांच्यासाठी तन, मन आणि धन अर्पण करुन मार्गदर्शन केल्यामुळे स्थानिक पातळीपासून आंतरराष्ट्रीय स्तरापर्यंत नेत्रदीपक यश संपादन केले. सरांनी रेखाटलेले प्रशालेतील फलक म्हणजे शाळेचे आरसे होय. हे फलक पालकांचे व अभ्यागतांचे चित्त वेधून घेत असत.विद्यार्थ्यांकडून चित्रकले बरोबरच विद्यार्थ्यांचे समूह नृत्य सरांनी बसवून घेतले .तसेच  शरद मल्हार नृत्य स्पर्धेमध्ये नृत्याच्या सुंदर कलाविष्काराने रसिक प्रेक्षकांची मने जिंकून त्यांनी प्रशालेस तृतीय क्रमांकाचे पारितोषिक मिळवून दिले.सरांच्या मार्गदर्शनामुळे अनेक विद्यार्थ्यांमधील विविध कलागुणांना वाव मिळाला.त्यामुळे त्यांचे विद्यार्थी सध्या सिनेसृष्टीत चमकदार कामगिरी करीत आहेत.

सरांनी प्रशालेतील विद्यार्थ्यांच्या माध्यमातून बाग फुलवली.वनराई संस्थेच्या सहकार्याने अनेक पर्यावरणपूरक उपक्रम प्रशालेत व प्रशालेबाहेर राबविले. बाणेर, सोमेश्वरवाडी परिसरात रामनदी स्वच्छता अभियानात विद्यार्थ्यांबरोबर सहभागी  झाले.प्रशालेमध्ये गळके नळ दुरुस्त करून लाखो लिटर पाण्याची बचत केली.
भारत- पाकिस्तान व कारगिल युध्दात जखमी झालेल्या सैनिकांसाठी  विद्यार्थी दरवर्षी स्वतः राख्या बनवून रेंजहिल्स परिसरात जाऊन त्यांना बांधत. त्याचबरोबर रक्षाबंधनच्या अगोदर सीमेवरील जवानांना राख्या पाठवत.या उपक्रमाचे जवान व लष्करातील अधिकाऱ्यांकडून सरांचे आणि विद्यार्थ्यांचे कौतुक केले जात होते.
कलेच्या उपासकाने अविरत कष्ट घेऊन रत्नांची खाण निर्माण केली आहे.अक्षय वाघमारे,निशाणी बोरुळे,राहूल ओव्हाळ  यांच्यासारखे अनेक विद्यार्थी सिने,चित्रकला आणि शिल्पकला क्षेत्रात स्वतःच्या कर्तृत्वाचा ठसा उमटवित आहेत.

पुणे जिल्हा परिषद, पुणे महानगरपालिका, रोटरी क्लब, लायन्स क्लब, पुणे सार्वजनिक सभा , प्रोग्रेसिव्ह एज्युकेशन सोसायटी आदी संस्थानी सरांच्या कार्याची दखल घेऊन त्यांना सन्मानित केले.या पुरस्कारा बरोबरच जवळ जवळ १०० पुरस्कारपेक्षा जास्त पुरस्काराचे ते मानकरी ठरले आहेत. मॉडर्न हायस्कूल गणेशखिंडमध्ये  १९९७  पासून आजपर्यंत त्यांनी समर्पित सेवा केली.येत्या 30 एप्रिल रोजी शासकीय नियमानुसार ते सेवानिवृत्त होत असले तरी त्यांचे शैक्षणिक व सामाजिक कार्य अव्याहतपणे सुरू राहील,ही आशा आहे.त्यांच्या भावी कार्यासाठी आम्हा सर्वांकडून खूप खूप शुभेच्छा.

- विनोदकुमार बंगाळे , शिक्षक