'आयआयटी मुंबई'ला माजी विद्यार्थ्यांकडून तब्बल २१ कोटींची देणगी 

एज्युवार्ता न्यूज नेटवर्क 

आयआयटी मुंबईला (IIT Bombay) माजी विद्यार्थ्यांनी तब्बल २१ कोटींची देणगी (Alumni donate Rs 21 crore) दिली आहे. आपण ज्या संस्थेत शिक्षण घेतले त्याची जाण ठेवून माजी विद्यार्थ्यांच्या रौप्य महोत्सवी बेंचने (Silver Jubilee Batch of Alumni) लेगसी प्रकल्पासाठी २१ कोटी रुपयांची देणगी संस्थेला दिल्याने त्यांच्या या सामाजिक कार्याचे सर्व स्तरातून कौतुक केले जात आहे. संस्थेतून शिक्षण घेतलेल्याला २५ वर्ष पूर्ण झाल्याच्या निमित्ताने माजी विद्यार्थ्यांनी ही मदत देऊ केली आहे. संस्थेतील महत्त्वपूर्ण संशोधन प्रकल्पांसाठी ही देणगी वापरली जाणार आहे. यामुळे आयआयटी मुंबई २०३० मध्ये जागतिक शिक्षण संस्थांच्या क्रमवारीत पहिल्या ५० मध्ये स्थान मिळवेल, असा विश्वास व्यक्त केला जात आहे. 

आयआयटी मुंबईचा माजी विद्यार्थी मेळावा नुकताच संपन्न झाला. यावेळी देण्यात आलेल्या या २१ कोटींच्या देणगीची घोषणा करण्यात आली. आयआयटी मुंबईच्या १९९९ च्या बॅचने २५ वर्ष पूर्ण झाल्याच्या निमित्ताने संस्थेत लेगसी प्रकल्प हाती घेतला आहे. संस्थेला आपण काही देणे लागतो या भावनेतून या माजी आयआयटी मुंबईने संस्थेतील विविध शैक्षणिक सुविधा आणि संशोधन प्रकल्पांसाठी निधी गोळा करून तो संस्थेकडे देण्यात आला आहे. 

माजी विद्यार्थ्यांनी हाती घेतलेल्या या आर्थिक मदत कार्यातून शिक्षण घेत असलेल्या आयआयटीच्या विद्यार्थ्यांसाठी आधुनिक आणि सुसज्ज असे वसतिगृह उभारले जात आहे. प्रोजेक्ट एव्हरग्रीन असे या प्रकल्पाला नाव देण्यात आले असून त्याच्या कामांची माहितीही या कार्यक्रमात देण्यात आली. माजी विद्यार्थ्यांनी देऊ केलेल्या या मदतीमुळे संस्थेतील विद्यार्थ्यांसाठी आणखी चांगल्या शैक्षणिक सुविधा निर्माण होणार आहेत.