लाखो विद्यार्थ्यांचा हिरमोड; यंदा स्वातंत्र्यदिन गणवेशाविनाच..  

एज्युवार्ता न्यूज नेटवर्क 

मुख्यमंत्री एकनाथ शिंदे (CM Eknath Shinde) यांनी अधिवेशन काळात सभागृहात मोठा गाजावाजाकरून राज्यातील विद्यार्थ्यांना १५ ऑगस्टपुर्वी शालेय गणवेश वाटप करण्याची घोषणा (School uniform distribution announcement) केली. मात्र, प्रत्यक्षात ही घोषणा विधानसभेच्या सभागृहातच विरगळल्याचे दिसून आले. कारण शाळा सुरू होऊन सुमारे दोन महिने उलटले असून स्वातंत्र्यदिन (independence day 2024) उद्यावर आला. मात्र, शिक्षण विभागाकडून अद्याप शालेय गणवेशाचे वाटप करण्यात आलेले नाही. त्यामुळे राज्यातील लाखो विद्यार्थ्यांचा हिरमोड झाला असून यंदाचा स्वातंत्र्यदिन देखील मागील वर्षीप्रमाणे गणवेशाविनाच जाणार असल्याचे स्पष्ट झाले आहे. त्यामुळे सरकारला विद्यार्थ्यांच्या गणवेशाचे गांभिर्य नाही का?  असा सवाल या निमित्ताने उपस्थित होतो.  

सरकारच्या या  कारभारावरून आता विरोधकांकडून टिकेची झोड उठवली जात आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार  यांनी मुख्यमंत्री एकनाथ शिंदे यांना उद्देशून आपल्या एक्स या सोशल मिडिया अकाउंटवर एक पोस्ट शेअर केली आहे. त्यामध्ये त्यांनी म्हटले आहे की, गणवेश वेळेत मिळणार नाहीत तसेच गुजरातमधून आणत असलेल्या ‘पॉलिस्टर-विस्कोस’ ऐवजी महाराष्ट्राचेच कॉटन चे गणवेश विद्यार्थ्यांना द्या,  म्हणून मी अधिवेशनात आपल्याला जाब विचारला असता आपण, अजित दादा, फडणवीस साहेब, शंभूराज देसाई सर्वांनी मिळून  “रोहितला गणवेश शिवून द्या” म्हणून खिल्ली उडवली होती. साहेब, सभागृहात मांडले जाणारे मुद्दे गांभिर्याने घ्यायचे असतात, परंतु, दुर्दैवाने तसे होताना दिसत नाही.  

१५ ऑगस्ट आला तरी तुमचे गणवेश विद्यार्थ्याना मिळालेले नाहीत. तुम्हाला जाब विचारणाऱ्या एका आमदारापर्यंत तुमचा गणवेश पोहचला नाही तर विद्यार्थ्यांपर्यंत कधी पोहोचणार ? मला गणवेश शिवून देण्याची भाषा करण्यापेक्षा विद्यार्थ्यांना गणवेश शिवून देण्यावर भर दिला असता तर अधिक बरे झाले असते. किमान आता तरी सिरियस होऊन कर्तुत्व दाखवा, असे रोहित पवार यांनी म्हटले आहे.

दरम्यान,पुणे जिल्ह्यामध्ये 2 लाख 42 हजार विद्यार्थ्यांपैकी 60 ते 70 हजार विद्यार्थ्यांना गणवेशाचे वाटप करण्यात आले आहे. उर्वरित विद्यार्थ्यांना येत्या ४ ते ५ दिवसांत गणवेश वाटप करण्याचे नियोजन आहे,असे पुणे जिल्हा परिषदेचे प्राथमिक शिक्षण अधिकारी संजय नाईकडे यांनी सांगितले.