शिक्षक, शिक्षकेतर कर्मचाऱ्यांना गणेश विसर्जनाची ड्यूटी; या महापालिकेने काढला आदेश  

एज्युवार्ता न्यूज नेटवर्क 

गणेश उत्सवाला (Ganesh Utsav)मोठ्या उत्साहात सुरुवात झाली असून श्रीं च्या आगमनाने लहान थोरांपासून सर्वांमध्ये आनंदाचे वातावरण आहे. त्यात कोल्हापूर महानगरपालिकेने गणेश विसर्जनाची तयारी सुरू केली असून या कामाची जबाबदारी शिक्षक व शिक्षकेतर कर्मचाऱ्यांवर (teachers and non-teaching staff)सोपविली आहे. पालिकेच्या शाळेतील तब्बल 92 शिक्षक,  शिक्षकेतर कर्मचाऱ्यांना गणेश विसर्जनाची ड्युटी (Ganesh Visarjan Duty)देण्यात आली आहे.

कोल्हापूर महानगरपालिकेचे अतिरिक्त आयुक्त राहुल रोकडे यांनी याबाबत परिपत्रक प्रसिद्ध केले असून त्यात 12 सप्टेंबर आणि 17 सप्टेंबर या दिवशी सकाळी 9 ते विसर्जन समाप्त होईपर्यंत संबंधित शिक्षकांनी ड्युटीवर रुजू राहावे, असे आदेश काढले आहेत. कोल्हापूर शहरामध्ये गणेशोत्सव मोठ्या संख्येने साजरा केला जातो. त्यामुळे कोल्हापूर महानगरपालिका कार्यक्षेत्रातील घरगुती गणपती विसर्जन व अनंत चतुर्दशी उत्सवादरम्यान सार्वजनिक गणेश विसर्जनाची प्रक्रिया सुलभरीत्या पार पाडण्याच्या दृष्टीने कोल्हापूर महानगरपालिकेच्या प्रशासकीय कामकाजाच्या सोयीसाठी शिक्षकांना नियुक्त करण्यात आले आहे. संबंधित शिक्षक व शिक्षकेतर कर्मचारी यांनी उपशहर अभियंता यांच्याशी संपर्क साधून त्यांनी दिलेल्या सूचनेप्रमाणे तसेच त्यांच्या आदेशानुसार कामकाज करावे, असे स्पष्ट केले आहे.

छत्रपती शिवाजी मार्केट कोल्हापूर या ठिकाणी संबंधित शिक्षकांनी ड्युटीवर रुजू राहावे, असे आदेशात नमूद केले आहे. त्याचप्रमाणे घरगुती विसर्जन व सार्वजनिक गणेश विसर्जनाकरिता नियुक्ती आदेश लागू करण्याची जबाबदारी प्रशासन अधिकारी यांची राहील. प्रशासन अधिकारी व उपशहर अभियंता कामकाजाबाबत समन्वय ठेवून यासंदर्भातील कामकाज करतील. तसेच या आदेशामध्ये बदल करण्यासाठी राजकीय दडपण कोणीही आणू नये, तसे केल्याचे आढळून आल्यास महाराष्ट्र नागरी सेवा नियम 197 च्या नियम 23 नुसार शिस्तभंगाची कारवाई होऊ शकेल, याची संबंधित कर्मचाऱ्यांनी नोंद घ्यावी, असेही या आदेशात नमूद करण्यात आले आहे.