पुणे महापालिकेत बनावट नियुक्ती घोटाळा: ४५ लाखांची फसवणूक, शिक्षण विभागातील कर्मचाऱ्यावर गुन्हा 

एज्युवार्ता न्यूज नेटवर्क 

पुणे महापालिकेच्या (Pune Municipal Corporation)  विविध विभागांत नोकरी लावून देण्याचे आमिष दाखवून एका शिपाई आणि त्याच्या साथीदारांनी उमेदवाराकडून ४५ लाख रुपये (Candidates defrauded of ₹45 lakh) उकळून बनावट नियुक्तीपत्र (Fake appointment letter) दिल्याचा धक्कादायक प्रकार उघडकीस आला आहे. या प्रकरणी जेजुरी देवस्थानचे विश्वस्त राजेंद्र बबन खेडेकर, महापालिकेच्या शिक्षण विभागातील शिपाई (Peon in the Education Department) शिवानंद बाळासाहेब पाटील, नमिता गोवर्धन बनसोडे व इतर साथीदारांविरोधात शिवाजीनगर पोलिस ठाण्यात गुन्हा दाखल करण्यात आला आहे. महापालिकेच्या सामान्य प्रशासन विभागाच्या अधीक्षकांनी दिलेल्या तक्रारीनुसार, हा फसवणुकीचा प्रकार मे २०२२ ते मे २०२५ या तीन वर्षांच्या कालावधीत घडला.

पोलिसांच्या माहितीनुसार, आरोपींनी पुणे महापालिकेत कायमस्वरूपी नोकरी देण्याचे आश्वासन देत अनेक बेरोजगार युवक-युवतींकडून मोठ्या रकमेची फसवणूक केली. पालिकेच्या सामान्य प्रशासन विभागाने प्राप्त तक्रारींची पडताळणी केली असता, पाटण येथील एका तरुणाला भवन विभागात कनिष्ठ अभियंता पदावर नियुक्ती दिल्याचे बनावट पत्र आणि टिळक रस्ता क्षेत्रीय कार्यालयात नेमणुकीचा खोटा आदेश आढळला. या तरुणाने महापालिकेला पाठवलेल्या नोटिशीनुसार, आरोपींनी वेळोवेळी ४५ लाख रुपये रोख व धनादेश स्वरूपात घेतले. या बनावट कागदपत्रांवर उपायुक्त व प्रशासकीय अधिकाऱ्यांच्या खोट्या स्वाक्षऱ्या, बनावट शिक्के, महापालिकेचे चिन्ह आणि वॉटरमार्कचा गैरवापर करण्यात आला.

या घोटाळ्यात आणखी अनेक पीडितांचा समावेश असू शकतो, अशी शक्यता पोलिसांनी व्यक्त केली आहे. आरोपींनी अनेक उमेदवारांना नियुक्ती, बदली आदेश, ओळखपत्रे आणि सेवा पुस्तिका देण्याचे आश्वासन देत आर्थिक फसवणूक केल्याचे समोर आले आहे. शिवाजीनगर पोलिसांकडून आर्थिक व्यवहार, बँक डिटेल्स, कागदपत्रे आणि डिजिटल पुराव्यांची सखोल तपासणी सुरू आहे.

दरम्यान, या प्रकरणात नाव आलेले डॉ. राजेंद्र खेडेकर यांनी आरोप पूर्णपणे फेटाळले आहेत. त्यांनी दिलेल्या निवेदनात आपण स्वतः या फसवणुकीचे पीडित असल्याचे सांगितले आहे. अनेक पीडितांना पैसे परत मिळवून देण्यासाठी पाठपुरावा केल्याचा दावा करत, त्यांनी महापालिकेच्या कोणत्याही नियुक्तीपत्र, स्वाक्षरी किंवा आर्थिक व्यवहाराशी आपला संबंध नसल्याचे स्पष्ट केले. निष्पक्ष चौकशी करून खऱ्या दोषींना शिक्षा व्हावी आणि बदनामी करणाऱ्यांवर कारवाई व्हावी, अशी मागणी त्यांनी केली आहे.