विद्यापीठात उलगडणार छत्रपती शिवाजी महाराज यांच्या जीवनाचे पैलू

एज्युवार्ता न्यूज नेटवर्क 

सावित्रीबाई फुले पुणे विद्यापीठातर्फे येत्या १२ आणि १३ जून २०२६ रोजी 'छत्रपती शिवाजी महाराज : द्रष्टे व्यवस्थापक' या विषयावर दोन दिवसीय राज्यस्तरीय निवासी कार्यशाळेचे आयोजन करण्यात आले आहे. पुणे पुस्तक महोत्सवाचे संयोजक राजेश पांडे यांच्या पुढाकाराने आणि राष्ट्रीय पुस्तक न्यास तसेच सावित्रीबाई फुले पुणे विद्यापीठ यांच्या संयुक्त विद्यमाने या विशेष कार्यशाळेचे आयोजन करण्यात आले आहे. संपूर्ण महाराष्ट्रातून शेकडो विद्यार्थी आणि इतिहासप्रेमी या निवासी कार्यशाळेसाठी पुण्यात दाखल होत आहेत.

या कार्यशाळेचे उद्घाटन येत्या शुक्रवारी १२ जून रोजी दुपारी १२:३० वाजता सार्वजनिक बांधकाम मंत्री शिवेंद्रराजे भोसले यांच्या हस्ते होणार आहे. या सोहळ्याच्या अध्यक्षस्थानी राष्ट्रीय पुस्तक न्यासाचे अध्यक्ष प्रा. मिलिंद मराठे भूषवणार असून, विद्यापीठाचे कुलगुरू डॉ. सुरेश गोसावी यांची प्रमुख उपस्थिती लाभणार आहे. छत्रपती शिवाजी महाराजांच्या मध्ययुगीन इतिहास आणि प्रशासनामागील आधुनिक व्यवस्थापकीय दृष्टिकोनाचा वेध या कार्यशाळेत घेतला जाईल.

पहिल्या दिवशी इतिहास अभ्यासक  सौरभ कर्डे (शिवरायांच्या व्यवस्थापन अभ्यासाची गरज), प्रा. डॉ. संजय चाकणे (पर्यावरण व्यवस्थापन), ऋत्विक कुलकर्णी (आर्थिक प्रशासन),  केतन पुरी (मोहीम व्यवस्थापन), आणि पांडुरंग बलकवडे (गनिमी कावा) यांचे मार्गदर्शन लाभणार आहे. तसेच पहिल्या दिवसाचा समारोप इतिहास अभ्यासक मोहन शेटे यांच्या 'शिवरायांचा दक्षिणदिग्विजय' या विशेष व्याख्यानाने होईल.

कार्यशाळेच्या दुसऱ्या दिवशी (१३ जून) डॉ. प्र. के. घाणेकर (दुर्ग-विज्ञान), रोहित पवार (प्रशासन), कौस्तुभ कस्तुरे (मानसशास्त्रीय व्यवस्थापन), गुरुप्रसाद कानिटकर (लष्करी व्यवस्थापन) आणि  रघुजीराजे आंग्रे (आरमार व्यवस्थापन) या विषयांवर प्रकाश टाकतील.