शिक्षण विभागाच्या वतीने पुण्यात दोन दिवसीय करियर मेळाव्याचे आयोजन 

एज्युवार्ता न्यूज नेटवर्क 

शिक्षण विभागाच्या (Department of Education) वतीने पुण्यात इयत्ता नववी ते बारावीच्या विद्यार्थ्यांसाठी दोन दिवशीय करिअर मेळाव्याचे (Two-day career fair) आयोजन करण्यात येणार आहे. जिल्हा शिक्षण प्रशिक्षण संस्था पुणे, शिक्षण विभाग (माध्यमिक), जिल्हा परिषद पुणे,  कौशल्य रोजगार, उद्योजगता व नाविन्यता विभाग, पुणे यांच्या संयुक्त विद्यमाने जागतिक बँक पुरस्कृत स्टार्स प्रकल्पांतर्गत इयत्ता ९ वी ते १२वी च्या विद्यार्थ्यासाठी १६ व १७ जानेवारी २०२५ रोजी वाडिया कॉलेज, पुणे येथे दोन दिवसीय करियर रोजगार मेळाव्याचे  आयोजित करण्यात आले आहे. 

राज्य शैक्षणिक व प्रशिक्षण परिषद सहसंचालिका अनुराधा ओक यांच्या हस्ते या मेळाव्याचे उद्घाटन करण्यात येणार आहे.  तर अनिल पवार उपजिल्हाधिकारी,  तथा उपव्यवस्थापकीय संचालक, छत्रपती शाहू महाराज संशोधन, प्रशिक्षण व मानव विकास संस्था, (सारथी) पुणे यांची प्रमुख उपस्थिती असणार आहे. तसेच हारून अत्तार  विभागीय शिक्षण उपसंचालक, पुणे विभाग हे अध्यक्षस्थानी असणार आहेत. मेळाव्याच्या पहिल्या दिवशी १६ जानेवारी रोजी विविध मान्यवरांचे मार्गदर्शन लाभणार आहे.  
 
तर  मेळाव्याच्या दुसऱ्या दिवशी १७ जानेवारी रोजी किमान १२ वी उत्तीर्ण किंवा त्याहून अधिकची शैक्षणिक अहर्ता  व वयाची १८ वर्ष पूर्ण असणाऱ्या विद्यार्थ्यांना नोकरीच्या संधी उपलब्ध करून देण्यासाठी Apprenticeship मेळावा/ रोजगार मेळावा सकाळी १० ते दुपारी ३  या वेळेत आयोजित करण्यात येणार आहे.  ज्यामध्ये जिल्ह्यातील विविध कंपन्यामार्फत विद्यार्थ्यांच्या मुलाखतीचे आयोजन व नियुक्ती पत्र देण्याचे नियोजन केले आहे. यासाठी विविध उद्योजकांना निमंत्रित केले आहे. या मेळाव्यामध्ये पहिल्या दिवशी इयत्ता ९ वी ते १२ वी च्या विद्यार्थ्यांनी व दुसऱ्या  दिवशी १८ पेक्षा अधिक वयोगटातील नोकरी इच्छुक विद्यार्थ्याना सहभागी होण्याचे आवाहन  करण्यात आले आहे.