जाचक अटींविरोधात क्लास चालक एकवटले;क्लासेस बचाव कृती समिती स्थापन
सोळा वर्षे वयाखालील मुलाला खाजगी शिकवणी मधील प्रवेशावर बंदी घालण्यात आली आहे. तसेच प्रत्येक क्लास चालकाला फायर ऑडिट करणे बंधनकारक असणार आहे, अशा अटींचा अंतर्भाव या कायद्यात केला जाणार आहे.
eduvarta@gmail.com 
एज्युवार्ता न्यूज नेटवर्क
प्रस्तावित कोचिंग क्लासेस अधिनियमामध्ये (Coaching Classes Act)खाजगी क्लासेसच्या संदर्भातील जाचक नियमावली आहे. नुकत्याच झालेल्या पावसाळी अधिवेशनात त्यावर चर्चा होणे अपेक्षित होते.परंतु, त्यावर कुठलीही चर्चा न करता पावसाळी अधिवेशनाचे सुप वाजले.मात्र, प्रस्तावित कायद्यातील जाचक अटींच्या विरोधात महाराष्ट्रातील नऊ कोचिंग क्लासेस संघटना (Coaching classes organization)एकत्र आल्या आहेत. तसेच या संघटनांनी एकत्र येऊन राज्यस्तरीय क्लासेस बचाव कृती समिती (State Level Classes Rescue Action Committee)स्थापन केली आहे.
खाजगी क्लासेस चालकांचा कोचिंग क्लासेस अधिनियमाला कोणताही विरोध नाही. परंतु,सोळा वर्षे वयाखालील मुलाला खाजगी शिकवणी मधील प्रवेशावर बंदी घालण्यात आली आहे. तसेच प्रत्येक क्लासचालकाला फायर ऑडिट करणे बंधनकारक असणार आहे, अशा जाचक अटींचा अंतर्भाव या कायद्यात केला जाणार आहे, त्यामुळे खाजगी क्लासेस चालकांनी या अटींच्या विरोधात उभे राहण्याचा निर्णय घेतला आहे, असे बंडोपंत भुयार यांनी सांगितले. भुयार याची या कृती समितीच्या उपाध्यक्षपदी तर मुंबई येथील महाराष्ट्र क्लास ओनर्स असोसिएशनचे प्रजेश ट्रॉस्की (President Prajesh Troski) यांची अध्यक्षपदी नियुक्ती झाली आहे.
महाराष्ट्र शासनाच्या प्रस्तावित कोचिंग क्लासेस अधिनियमाचा अभ्यास करुन त्यातील केवळ ज्याचक अटीला विरोध करण्यासाठी दादर पूर्व येथील हॉटेल सिटी पॉईंट सभागृहात महाराष्ट्रातील कोचिंग क्लासेसच्या नऊ संघटना एकत्र आल्या. या संघटनांनी क्लासेस बचाव कृती समिती स्थापना केली . प्रजेश ट्रॉस्की हे समितीचे अध्यक्ष असून अमरावती येथील कोचिंग क्लासेस टीचर्स फेडरेशन अँड सोशल फोरम महाराष्ट्रचे बंडोपंत भुयार यांची हे उपाध्यक्ष आहेत. प्रोफेशनल टीचर असोसिएशनचे सांगली येथील रवींद्र फडके व नागपूर येथील कोचिंग क्लासेस असोसिएशनचे बोंद्रे सर यांचीही उपाध्यक्षपदी निवड झाली आहे. कोचिंग क्लासेस वेल्फेअर असोसिएशन नाशिकचे यशवंत बोरसे यांची कार्याध्यक्षपदी निवड झाली असून असोसिएशन ऑफ कोचिंग क्लास ओनर्स अंड मेंटॉर्स मुंबईचे दिलीप मेहंदळे यांची सचिव पदी निवड झाली.
कोचिंग क्लास असोसिएशन संभाजीनगर (औरंगाबाद )चे पांडुरंग वाघ यांची सहसचिव पदी निवड झाली आहे. कोचिंग क्लासेस असोसिएशन ठाणे येथील प्रकाश पाटील यांची खजिनदारपदी व खाजगी शिक्षक संघ नागपूरचे सचिन गजभिये यांची सहसचिव पदी निवड झाली. कोचिंग क्लासेस प्रोप्रायटर्स असोसिएशन ठाणे येथील सतीश देशमुख यांची समन्वयक पदी व महाराष्ट्र क्लास ओनर्स असोसिएशन मुंबई येथील संतोष वासकर यांची संघटक पदी निवड करण्यात आली. यानिमित्ताने महाराष्ट्रातील लाखोच्या संख्येने असलेले कोचिंग क्लासेस संचालक एका क्षेत्राखाली आलेले आहेत. तसेच राज्यातील या समितीच्या माध्यमातून सर्व विभागांना प्रतिनिधित्व मिळालेले आहे.
