नगरपरिषद भरतीमधील अनुभवाची अट रद्द करा; स्पर्धा परीक्षा समन्वय समिती मागणी 

एज्युवार्ता न्यूज नेटवर्क

नगरविकास विभागामार्फत (Urban Development Department) नुकतेच विविध पदांसाठीचे सेवाप्रवेश नियम प्रसिद्ध करण्यात आले आहेत. त्यापैकी "वरिष्ठ लिपिक" (Senior Clerk) पदासाठी तीन वर्ष अनुभवाची अट (Three years of experience required) ठेवण्यात आली आहे. राज्य शासनाअंतर्गत इतर विभागात भरण्यात येणाऱ्या वरिष्ठ लिपिक पदासाठी अशा प्रकारची अनुभवाची अट नाही. या अनुभावाच्या अटीमुळे हजारो उमेदवारांच्या संधी हिरावल्या जाणार आहेत. त्यामुळे नगरपरिषद संचालनालयाने ही अट रद्द करावी, अशी मागणी स्पर्धा परीक्षा समन्वय समितीच्या (Competitive Examination Coordination Committee) वतीने करण्यात आली आहे. 

वरिष्ठ लिपिक पदासाठी तीन वर्षाचा अनुभव बंधनकारक करण्यात आला आहे. आधीपासूनच बेरोजगार असलेल्या उमेदवारांसाठी नवे सेवाप्रवेश नियम अन्यायकारक आहेत. राज्य शासनातील बहुसंख्य विभागांमध्ये नुकतीच "वरिष्ठ लिपिक" पदांसाठी भरती झाली आहे. आदिवासी विकास विभाग भरती, न्यायवैद्यक प्रयोगशाळा भरती, वैद्यकीय शिक्षण विभाग भरती, MIDC भरती आणि इतर अशा अनेक विभागांनी वरिष्ठ लिपिक संवर्गातील पदे भरली जात आहेत. अशा सर्व विभागांनी वरिष्ठ लिपिक पदासाठी अनुभवाची कोणतीही अट ठेवलेली नव्हती. मात्र, या भरती प्रक्रियेत अशा प्रकारची अट का घालण्यात आली असा सवाल उपस्थित करण्यात आला आहे. 

राज्य शासनातील एकाच संवर्गातील पदासाठी वेगवेगळे सेवाप्रवेश नियम असू शकत नाहीत. येत्या काळात अशा अन्यायकारक सेवा प्रवेश नियमांना न्यायालयात आव्हान दिले गेल्यास, पदभरती न्यायालयीन कचाट्यात अडकून बसण्याची भीती आहे. तसेच असे प्रकरण न्यायालयात गेल्यास, मा. न्यायालय योग्य तो निर्णय घेऊन सदर सेवाप्रवेश नियम बाद ठरवेल असा आम्हाला विश्वास आहे. राज्यातील लाखो उमेदवार स्पर्धा परीक्षेचे तयारी करत आहेत, अनुभवाची अट ठेवल्यास लाखो उमेदवार स्पर्धेतून बाहेर फेकले जाण्याची भीती आहे. नगरपरिषद भरती आणखी गुंतागुंतीची होऊ नये म्हणून आपण "वरिष्ठ लिपिक" पदासाठी असणारी अनुभवाची अट मागे घ्यावी. नगरविकास विभागाने नवीन सेवाप्रवेश नियम प्रसिद्ध करावे, त्यानुसार अनुभवाची अट रद्द करावी आणि नगरपरिषद पदभारतीची जाहिरात लवकरात लवकर प्रसिद्ध करावी, अशी मागणी स्पर्धा परीक्षा समन्वय समितीने केली आहे.