CET 2025 : LLB ५ वर्षे, MBA सह विविध प्रवेश परीक्षेच्या तारखेत बदल 

एज्युवार्ता न्यूज नेटवर्क 

बारावी सीबीएसई बोर्ड परीक्षेचे (Class 12 CBSE Board Exam) पेपर आणि राज्यातील सीईटी परीक्षेच्या तारखा एकत्र (CET Cell Exam Date postponed) आल्याने राज्यातील हजारो विद्यार्थी संभ्रमात होते. त्यानंतर आता विद्यार्थी व पालक यांच्याकडून आलेल्या सूचनांमुळे सीईटी सेलने अखेर जाहीर केलेल्या परीक्षांच्या तारखांमध्ये बदल केला आहे.  तंत्रशिक्षणविभागाच्या अंतर्गत येत असलेल्या २ आणि उच्च शिक्षण विभागाच्या अंतर्गत असलेल्या ३ अशा पाच अभ्यासक्रमांच्या सीईटीच्या तारखेत बदल करण्यात आलेला आहे. 

येत्या १ ते ४ एप्रिल दरम्यान बारावी सीबीएसई परीक्षा मधील इतिहास, भाषा विषय, होम सायन्स आणि मानसशास्त्र या विषयांचे सलग चार दिवस पेपर असणार आहेत. ४ एप्रिल रोजी मानसशास्त्राचा पेपर आणि सीईटीचा निधी ५ वर्षे ही परीक्षा एकाच दिवशी असल्याचे समोर आले. त्यामुळे सीईटी सेलकडून १ ते ४ एप्रिल रोजी आयोजित केलेल्या परीक्षांच्या वेळापत्रकामध्ये बदल करावा, अशी मागणी विद्यार्थी आणि पालकांकडून होत होती. त्याची दखल घेत ४ एप्रिल रोजी होणारी पाच वर्ष विधी या अभ्यासक्रमाची प्रवेश पूर्व परीक्षा आता नव्या तारखेनुसार २८ एप्रिल रोजी होणार आहे. बीएड आणि एमपीईड या दोन सीईटी १६ मार्च रोजी होणार होत्या आता या तारखेत बदल केला असून १९ मार्च रोजी होणार आहे. 

एमपीएड फिल्ड चाचणी परीक्षेच्या तारखेतही बदल केला असून पुर्वी ही परीक्षा १७ ते १८ मार्च या कालावधीत होणार होती आता २० आणि २१ मार्च रोजी होणार आहे. तर तंत्र शिक्षण विभागाअंतर्गत येत असलेल्या एमबीए / एमएमएस परीक्षा १७ ते १९ मार्च या कालावधीत पूर्वी होणार होती आता ही परीक्षा १ ते ३ एप्रिल या कालावधीत होणार आहे. तर बीबीए/बीसीए/बीबीएम ही सीईटी परीक्षा पूर्वी १ ते ३ एप्रिल या कालावधीत होणार होती आता २९ ते ३० एप्रिल अणि २ मे रोजी होणार आहे. व्यावसायिक अभ्यासक्रमांना पुढील वर्षी प्रवेश घेत असलेल्या विद्यार्थ्यांना आतापासूनच परीक्षांची तयारी करता यावी यासाठी सीईटी सेलकडून नोव्हेंबरमध्येच १९ अभ्यासक्रमांच्या प्रवेश पूर्व परीक्षा (सीईटी) चे संभाव्य वेळापत्रक जाहीर केले आहे. या परीक्षेला बसण्यासाठी अर्ज नोंदणीही सुरू झाली आहे.

असा भरता येणार अर्ज 

सर्वप्रथम अधिकृत वेबसाइट cetcell.mahacet.org ला भेट द्या. वेबसाइटच्या उजव्या बाजूला उपलब्ध असलेल्या ‘CET (परीक्षा) पोर्टल २०२५-२६’ टॅबवर क्लिक करा. जर तुम्ही नवीन वापरकर्ता असाल तर ‘नोंदणी करा’ बटणावर क्लिक करा. अन्यथा, ‘साइन इन’ टॅबवर क्लिक करा. नोंदणीकृत ईमेल आयडी आणि पासवर्ड सारखी माहिती प्रविष्ट करा. ‘सबमिट करा’ बटणावर क्लिक करा. वैयक्तिक आणि शैक्षणिक तपशीलांसह MHT CET अर्ज फॉर्म २०२५ भरा. अधिकृत अधिसूचनेत वर्णन केलेल्या प्रक्रियेनुसार आवश्यक कागदपत्रे अपलोड करा. MHT CET नोंदणी शुल्क भरा. फॉर्म सबमिट करा.