परदेशी शिक्षणाचे स्वप्न आता मायदेशात पूर्ण होणार; ब्रिस्टल विद्यापीठाचे कॅम्पस मुंबईत

एज्युवार्ता न्यूज नेटवर्क

ब्रिटनमधील प्रतिष्ठित ब्रिस्टल विद्यापीठाला (University of Bristol) भारताची आर्थिक राजधानी, मुंबईत कॅम्पस स्थापन (Campus established in Mumbai) करण्यासाठी विद्यापीठ अनुदान आयोगाकडून (यूजीसी) मान्यता मिळाली आहे. विशेष म्हणजे, पुढील वर्षापासून हे विद्यापीठ सुरू होणार आहे. या महत्त्वपूर्ण निर्णयामुळे ब्रिटनमध्ये जाऊन शिक्षण घेण्याची इच्छा असलेल्या, परंतु आर्थिकदृष्ट्या ते न परवडणाऱ्या विद्यार्थ्यांना त्यांचे स्वप्न मायदेशातच पूर्ण करता येणार आहेत.

जिल्हा परिषदेकडून शाळेतील मुलांसाठी 'सायकल बँक' उपक्रम

मागील काही वर्षात विदेशातील प्रगत शिक्षणाकडे भारतीय विद्यार्थ्यांचा ओढा प्रचंड वाढला आहे. परंतु, कठोर व्हिसा नियम, अवाढव्य खर्च व भारतीय विद्यार्थ्यांवर होणारे हल्ले अशा अनेक कारणांमुळे विदेशातील प्रख्यात विद्यापीठांना भारताचे द्वार खुले करून गरज होती. या पार्श्वभूमीवर, केंद्र सरकारकडून ' राष्ट्रीय शिक्षण धोरण २०२०'च्या (एनईपी) पाचव्या वर्धापन दिनानिमित्त ब्रिस्टल विद्यापीठाला मुंबईत कॅम्पस उभारण्याला मंजुरी देणारे पत्र देण्यात आले आहे. 'तंत्रज्ञान, नावीन्यता आणि कला क्षेत्राशी मुंबईचे असलेले अजोड नाते व प्रतिष्ठा लक्षात घेत ब्रिस्टल विद्यापीठाने या शहराची निवड केली. त्यानुसार मध्य मुंबईजवळ या विद्यापीठाचे कॅम्पस असेल. ते सप्टेंबर २०२६मध्ये सुरू होणार आहे, असे संबंधित अधिकाऱ्यांनी सांगितले आहे.

ब्रिटनमधील ब्रिस्टल विद्यापीठासोबतच ऑस्ट्रेलियातील वेस्टर्न सिडनी, व्हिक्टोरिया आणि ला ट्रोब विद्यापीठाला भारतात कॅम्पस स्थापन करण्यासाठी स्वारस्यपत्र देण्यात आले आहे. यातील वेस्टर्न सिडनी विद्यापीठ ग्रेटर नोएडा येथे, व्हिक्टोरिया विद्यापीठ नोएडा येथे, तर ला ट्रोब विद्यापीठ बेंगळुरूमध्ये कॅम्पस उभारणार आहे. १९८९मध्ये स्थापन झालेल्या वेस्टर्न सिडनी विद्यापाठीचे १३ कॅम्पस असून, ४९ हजारहून अधिक विद्यार्थी शिक्षण घेत असलेले हे एक आघाडीचे सार्वजनिक संशोधन विद्यापीठ आहे.