'पीसीआय'चा मोठा निर्णय! ओपन स्कूलमधून शिक्षण घेतलेले विद्यार्थी फार्मसी अभ्सासक्रमासाठी पात्र

एज्युवार्ता न्यूज नेटवर्क 

केंद्र व राज्य सरकारच्या ओपन स्कूल शिक्षण प्रणालीतून (Open School Education System) शिक्षण पूर्ण केलेल्या विद्यार्थ्यांना फार्मसी अभ्यासक्रमांसाठी पात्र ठरवण्याचा निर्णय भारतीय औषधनिर्माणशास्त्र परिषदेने (पीसीआय) घेतला आहे. या निर्णयामुळे डी. फार्म, बी. फार्म आणि फार्मा.डी अभ्यासक्रमांना (D.Pharm, B.Pharm and Pharm.D courses) प्रवेश घेऊ इच्छिणाऱ्या विद्यार्थ्यांना मोठा दिलासा मिळाला आहे. पीसीआयच्या कार्यकारी समितीच्या नुकत्याच झालेल्या बैठकीमध्ये हा निर्णय घेण्यात आला असून, याची अंमलबजावणी करण्याचे आदेश सर्व महाविद्यालये व विद्यापीठांना (Orders to colleges and universities) दिले आहेत.

ओपन स्कूल संस्थांमधून ज्या विद्यार्थ्यांनी औषधनिर्माणशास्त्र अभ्यासक्रम उत्तीर्ण झाले आहेत, किवा जे विद्यार्थी सध्या औषधनिर्माण अभ्याक्रम शिकत आहेत, असे विद्यार्थी फार्मसी अधिनियम १९४८ अंतर्गत फार्मासिस्ट म्हणून नोंदणीसाठी पात्र मानण्यात येणार आहेत. मात्र, त्यासाठी अधिनियमातील इतर अटी पूर्ण करणे आवश्यक राहणार असल्याचेही पीसीआयकडून स्पष्ट करण्यात आले आहे. हा आदेश डी. फार्म, बी. फार्म, आणि फार्म.डी अभ्यासक्रम चालवणाऱ्या सर्व मान्यताप्राप्त संस्थांना, राज्य औषधनिर्माणशास्त्र परिषद, विद्यापीठे व परीक्षा यंत्रणा तसेच सर्व राज्य सरकारे व केंद्रशासित प्रदेशांना लागू राहणार असल्याचेही परिषदेकडून जाहीर करण्यात आले आहे.

ओपन स्कूल शिक्षण प्रणालीद्वारे शिक्षण घेणाऱ्या विद्यार्थ्यांना आतापर्यंत प्रवेश व नोंदणी संदर्भात अनेक अडचणींना सामोरे जावे लागत होते. पीसीआयच्या या स्पष्ट निर्णयामुळे आता प्रवेश प्रक्रिया, शिक्षणाची वैधता आणि व्यावसायिक नोंदणी याबाबतचा संभ्रम दूर होण्याची अपेक्षा व्यक्त केली जात आहे. तसेच डी. फार्म, बी. फार्म आणि फार्मा.डी अभ्यासक्रमांना प्रवेश घेऊ इच्छिणाऱ्या विद्यार्थ्यांना मोठा दिलासा मिळणार आहे.