ज्या मुलासाठी बापाने धडपड केली; त्यानेच परीक्षेच्या १० दिवस आधी पेपर मिळाल्याची कबुली दिली, मोटेगावकर फसला... 

एज्युवार्ता न्यूज नेटवर्क 

नीट-यूजी २०२६ (NEET-UG 2026) पेपर फुटी प्रकरणात (NEET Paper Leak Scandal) लातूरचा प्रसिद्ध शिक्षण व्यावसायिक शिवराज मोटेगावकर (Shivraj Motegaonkar) याच्या अडचणींमध्ये मोठी वाढ झाली आहे. केंद्रीय अन्वेषण ब्युरोने त्याच्या अल्पवयीन मुलाची पुण्यात चौकशी (CBI Inquiry) केली असता, मुलाने वडिलांच्या विरोधात महत्त्वाची कबुली दिली आहे. "परीक्षेच्या १० दिवस आधीच वडिलांनी तिन्ही विषयांचे पेपर आणून दिले होते," असा जबाब सीबीआयला मुलाने दिल्याचे सांगितले जात आहे. विशेष म्हणजे सीबीआय आता याच मुलाला प्रकरणातील मुख्य साक्षीदार (Key Witness) बनवण्याच्या विचारात आहे. यामुळे मोटेगावकर भोवती पूर्णपणे फास आवळला जात असल्याचे दिसून येत आहे. 

सीबीआयच्या तपासानुसार, शिवराज मोटेगावकर याने NTA शी संबंधित व्यक्तींसोबत मिळून पेपर लीक करण्यात महत्त्वाची भूमिका बजावली. २३ एप्रिल रोजी त्यांच्या मोबाइलमध्ये लीक झालेली प्रश्नपत्रिका आढळली आहे. हस्तलिखित नोट्स, डिलीट केलेला डेटा आणि इतर पुराव्यांमुळे ते १०वा आरोपी म्हणून अटक झाला आहे. त्याच्यावर क्लासेसमधील विद्यार्थ्यांना आणि इतरांना लीक पेपर पुरवल्याचा आरोप आहे. या प्रकरणात आतापर्यंत महाराष्ट्रातील ९ जणांना सीबीआयने ताब्यात घेतले असून त्यांची चौकशी सुरु आहे. यामध्ये शिवराज मोटेगावकर, पी. व्ही. कुलकर्णी, डॉ. मनोज शिरुरे, मनीषा हवालदार, मनीषा मांढरे, मनीषा वाघमारे, शुभम खैरनार, धनंजय लोकहंडे, तेजस शाह यांचा समावेश आहे. 

सीबीआयने मोटेगावकरांच्या अल्पवयीन मुलाची पुण्यातील कार्यालयात चौकशी केली. मुलाने दिलेल्या जबाबानुसार, वडिलांनी परीक्षेच्या दहा दिवस अगोदरच रसायनशास्त्र, भौतिकशास्त्र आणि जीवशास्त्राचे पेपर उपलब्ध करून दिले होते. मुलाने स्वतः परीक्षा दिली होती. या खुलाशामुळे सीबीआयला मजबूत पुरावा मिळाला आहे. मुलाला संरक्षण देऊन मुख्य साक्षीदार बनवण्याची योजना आखली जात आहे. या प्रकरणात सीबीआयने आतापर्यंत देशभरातील १२-१३ जणांना अटक केली आहे.

 लातूर कोचिंग सर्किट, पेपर सेटर पी.व्ही. कुलकर्णी आणि इतरांशी संबंध उघडकीला आले आहेत. मोटेगावकर यांच्या घर आणि संस्थेवर झालेल्या छाप्यांमध्ये मोबाइल, दस्तऐवज आणि डिजिटल पुरावे जप्त करण्यात आले. त्यांच्या संस्थेतून गेल्या वर्षी उत्तीर्ण झालेल्या १९ विद्यार्थ्यांवरही तपास सुरू आहे. यामुळे देशाच्या शिक्षण व्यवस्थेवर गंभीर प्रश्नचिन्ह निर्माण झाले आहेत. हा प्रकार फक्त एका व्यक्तीचा नाही, तर कोचिंग संस्कृती, पालकांचा दबाव आणि परीक्षा प्रणालीतील कमकुवतपणा दर्शवतो. सीबीआयचा तपास सुरू असून, आणखी अटक होण्याची शक्यता आहे.