भटक्या कुत्राचा दोन विद्यार्थ्यांवर हल्ला, ६ वर्षाच्या भावाला वाचवताना बहिण गंभीर जखमी 

एज्युवार्ता न्यूज नेटवर्क 

अंबरनाथ पश्चिमेतील (Ambarnath News) वांद्रापाडा परिसरातून एक धक्कादायक घटना समोर आली आहे. एक भटक्या कुत्र्याने दोन चिमुकल्यांवर हल्ला (Stray Dog Attack) करून एका ११ वर्षाच्या विद्यार्थिनीला गंभीर जखमी (Girls seriously injured) केले आहे. सहा वर्षाच्या भावावर कुत्राने हल्ला केल्याने त्याला वाचवण्यासाठी पुढे आलेल्या चिमुकलीवर हल्ला केला. एवढ्या कोवळ्या जीवाला चावा घेतल्याने पालकांनी प्रशासनावर संताप (Parents angry) व्यक्त केला आहे. या घटनेमुळे परिसरात भीतीचे वातावरण पसरले आहे.

वंशिका नागर ही विद्यार्थिनी आपल्या सहा वर्षीय भावासोबत शाळेतून घरी जात होती. रस्त्याने चालत असताना अचानक एका भटक्या कुत्र्याने त्यांच्या दिशेने धाव घेत झडप घातली. वंशिका पळाली मात्र सहा वर्षाचा भाऊ कुत्र्याच्या तावडीत सापडला. भावावर हल्ला होऊ नये म्हणून वंशिकाने तत्काळ पुढे येत कुत्र्याला रोखण्याचा प्रयत्न केला. मात्र, कुत्र्याने तिच्यावरच हल्ला चढवत तिला चावल्याने ती गंभीर जखमी झाली. हा संपूर्ण प्रकार परिसरातील सीसीटीव्ही कॅमेऱ्यातही कैद झाला आहे.

घटनेची माहिती मिळताच परिसरातील नागरिकांनी तातडीने धाव घेत मुलीची सुटका केली आणि तिला उपचारासाठी जवळच्या रुग्णालयात दाखल केले. सध्या तिच्यावर उपचार सुरू आहेत. दरम्यान, समोर आलेल्या माहितीनुसार, दरवर्षी शेकडो नागरिकांवर व विद्यार्थ्यांवर हल्ल्यांच्या घटना घडत असल्याची नोंद अंबरनाथ आरोग्य विभागाकडे आहे. विशेषतः शाळकरी मुलांवर होणाऱ्या हल्ल्यांच्या घटनांमुळे पालकांमध्येही भीतीचे वातावरण आहे.