'एमपीएससी'ची आणखी एक मोठी जाहिरात प्रसिद्ध : राज्यसेवेच्या ५५२ पदांसाठी भरती प्रक्रिया सुरू

एज्युवार्ता न्यूज नेटवर्क

महाराष्ट्र लोकसेवा आयोग (MPSC) मार्फत महाराष्ट्र गट-ब (अराजपत्रित) सेवा संयुक्त भरती २०२६ ची (Services Joint Recruitment 2026) अधिकृत अधिसूचना जाहीर करण्यात आली आहे. या भरतीअंतर्गत एकूण ५५२ रिक्त पदे (552 vacant posts) भरण्यात येणार असून पात्र उमेदवारांकडून ऑनलाईन अर्ज मागविण्यात येत आहेत. स्पर्धा परीक्षा देणाऱ्या उमेदवारांसाठी ही मोठी संधी उपलब्ध झाली आहे.  या भरती प्रक्रियेसाठी उद्या १० एप्रिलपासून ऑनलाइन पद्धतीने अर्ज प्रक्रिया सुरू (Application process started) केली जाईल. अर्ज करण्याची अंतिम मुदत ३० एप्रिल (Deadline April 30) २०२६ पर्यंत देण्यात आली आहे. 

या भरती मोहिमेअंतर्गत सहायक कक्ष अधिकारी -०६ पदे, राज्य कर निरीक्षक -२३६ पदे, पोलीस उपनिरीक्षक -३१० पदे भरली जाणार आहे. शैक्षणिक पात्रता ही पदानुसार वेगवेगळी असून, साधारणपणे मान्यताप्राप्त विद्यापीठाची पदवी किंवा समतुल्य असणारी शासनाने घोषीत केलेली इतर कोणतीही समकक्ष अहर्ता पूर्ण केलेली असणे आवश्यक आहे. पीएसआय पदासाठी विशिष्ट शारीरिक पात्रताही लागू आहे. 

या भरती प्रक्रियेत सहभागी होण्यासाठी उमेदवाराच्या वयोमर्यादेची अट महत्त्वाची मानली जाते. जाहिरातीनुसार, सहायक कक्ष अधिकारी आणि राज्य कर निरीक्षक पदासाठी उमेदवाराचे वय किमान १८ तर कमाल ३८ दरम्यान असणे आवश्यक आहे. तर पोलीस उपनिरीक्षक पदासाठी किमान १९ तर कमाल ३१ वर्षे या दरम्यान असावे. मागासवर्गीय उमेदवारांसाठी आरक्षणनिहाय सवलती आणि इतर अटी आयोगाच्या अधिसूचनेनुसार लागू राहतील. खुला प्रवर्गातील उमेदवारांना ३९४ रुपये, मागसवर्गीय/अनाथ/दिव्यांग/माजी सैनिक उमेदवारांना २९४  परीक्षा शुल्क भरावा लागेल.

या भरती प्रक्रियेत पूर्व परीक्षा, मुख्य परीक्षा आणि मुलाखत अशा टप्प्यांद्वारे उमेदवारांची निवड केली जाणार आहे. स्पर्धा परीक्षा देणाऱ्या विद्यार्थ्यांसाठी ही भरती अत्यंत महत्त्वाची मानली जात आहे. या भरतीकडे राज्यातील हजारो उमेदवारांच्या नजरा होत्या. त्यामुळे इच्छुकांनी वेळेवर अर्ज करून परीक्षेची तयारी सुरू करण्याचे आवाहन करण्यात आले आहे.