'ज्योती सावित्री इंटरनॅशनल स्कूल'साठी, जिल्हा परिषद, सरकार आणि क्रिस्टल हाऊस यांच्यात करार

एज्युवार्ता न्यूज नेटवर्क 

खानवडी येथील ज्योती सावित्री इंटरनॅशनल स्कूल (Jyoti Savitri International School) चालवण्यासाठी पुणे जिल्हा परिषद, राज्य सरकार आणि क्रिस्टल हाऊस इंडिया (Pune Zilla Parishad, State Government and Crystal House India) या संस्थेमध्ये मेमोरॅन्डम ऑफ अंडरस्टॅडिंग साईन (Compromise Agreement) करण्यात आला आहे. यावेळी उपमुख्यमंत्री अजित पवार, शिक्षण मंत्री दादा भुसे, विधान परिषदेच्या उपसभापति निलम गोऱ्हे आणि क्रिस्टल हाऊस इंडिया चे सीइओ जेसन मॅथ्यू (CEO Jason Matthew) उपस्थित होते. क्रिस्टल हाऊस इंडिया ही एक आंतरराष्ट्रीय पातळीवर मान्यताप्राप्त स्वयंसेवी संस्था असून या कराराच्या माध्यमातून त्यांनी वंचित घटकांसाठी ज्योति सावित्री इंटरनॅशनल स्कूल चालवण्यास घेतली आहे. या शाळेच्या माध्यमातून वंचित घटकांमधल्या मुला- मुलींसाठी दर्जेदार शिक्षणाची दारं खुली करून दिली जाणार असल्याचे सांगण्यात आले आहे. 

महात्मा ज्योतीबा फुले आणि सावित्रीबाई फुले यांनी स्त्री शिक्षणासोबतच वंचितांच्या शिक्षणासाठी आयुष्य वेचलं. पुण्यात येण्यापूर्वी फुले कुटुंब ज्या गावात रहायचे त्या पुरंदर तालुक्यातील खानवडी मध्ये मात्र अनेक विद्यार्थ्यांना शिक्षणासाठी धडपडावं लागत होतं. याच हेतुने त्यांच्या विचाराचं स्मारक उभारण्यासाठी खानवडीचे ग्रामस्थ, पुणे जिल्हा परिषद आणि पेन्सिव्ह आर्किटेक्चर कंपनीने वंचित घटकांसाठी शाळा उभारण्याचा निर्णय घेतला. फियाट इंडिया प्रायव्हेट लिमिटेड या कंपनीच्या सामाजिक दायित्व निधीच्या माध्यमातून या शाळेची इमारत उभी राहिली. शाळेच्या इमारतीचे काम अंतिम टप्प्यात असताना क्रिस्टल हाऊस इंडियाने केलेल्या या करारामुळे आता पुढच्या शैक्षणिक वर्षापासून ही शाळा सुरू होणार आहे.

एप्रिल २०२६ मध्ये पहिल्या टप्प्यात बालवाडी ते दुसरी या टप्प्यासाठी सुरू होणारी ही शाळा पुढे वंचित घटकांमधील एकूण १८५० विद्यार्थ्यांना १२ पर्यंतचे शिक्षण देणार आहे. महत्त्वाची बाब म्हणजे सामाजिक दायित्व निधीच्या माध्यमातून वंचित घटकांच्या मुलांच्या शिक्षणासाठी खर्च केला जाईल. सीबीएसई पॅटर्न नुसार ही शाळा चालेल. तसेच क्रिस्टल हाऊस तर्फे विद्यार्थ्यांना शिक्षणा सोबत पोषण आहार, वाहतुकीची सोय, शैक्षणिक साहित्य याबरोबरच आरोग्याच्या सुविधा देखील देण्यात येतील. यात पुढच्या टप्प्यावर पाचवी आणि सहावी पासून गरजू मुलींसाठी निवासी सुविधा देखील पुरवण्यात येईल. क्रिस्टल हाऊस मॉडेल नुसार बालवाडी मध्ये शाळेत प्रवेश घेतलेल्या विद्यार्थ्यांना बालवाडी पदवी अभ्यासक्रमापर्यंत त्यांना सहाय्य करण्यात येणार आहे.

क्रिस्टल हाऊस ने पुणे जिल्हा परिषदेसोबत केलेल्या या करारामुळे आता खानवडी आणि परिसरातील वंचित विद्यार्थ्यांना शिक्षणाची कवाडे खुली होणार आहेत. १२ एकर वर पसरलेल्या ज्योती सावित्री इंटरनॅशनल स्कूलच्या कॅम्पस मध्ये जागतिक पातळीवर यशस्वी ठरलेले क्रिस्टल हाऊसचे मॉडेल राबवले जाणार आहे. याच मॉडेलचा फायदा क्रिस्टल हाऊसच्या बंगलोर आणि नया रायपूर येथील विद्यार्थ्यांना झाला होता.
_____________________________________________

“पुणे जिल्हा परिषद शिक्षण क्षेत्रात सार्वजनिक-खाजगी भागीदारीसाठी पुढाकार घेत आहे आणि अनेक संस्था एकत्र येऊन JSIS प्रत्यक्षात उतरते आहे, याचा आम्हाला आनंद आहे. क्रिस्टल हाऊसचे यशस्वी मॉडेल पाहता, खानवडी व आजूबाजूच्या गावातील वंचित मुलांना दर्जेदार शिक्षण पुर्णपणे मोफत मिळेल याचा विश्वास आहे. ही भागीदारी ग्रामीण भागातील प्रत्येक मुलाला समान आणि दर्जेदार शिक्षण मिळावे, यासाठी एक महत्त्वाचे पाऊल आहे. शाळेची संकल्पना सावित्रीबाई आणि महात्मा फुले यांना आदरांजली म्हणून विकसित झाली आहे. आम्हांला समाधान आहे की या माध्यमातून गरीब व गरजू मुलांबरोबरच मुलींच्या शिक्षणाला विशेष प्रोत्साहन देण्याची संधी मिळणार आहे.”

- गजानन पाटील, मुख्य कार्यकारी अधिकारी, पुणे जिल्हा परिषद 
______________________________________________

“पुणे जिल्हा परिषद व महाराष्ट्र सरकारच्या सहकार्याबद्दल आम्ही अत्यंत आभारी आहोत. ही ऐतिहासिक भागीदारी म्हणजे अनेक घटकांनी एकत्र येऊन एक स्वप्न साकार करण्याची प्रेरणादायी कहाणी आहे. महाराष्ट्र शासन, पुणे जिल्हा परिषद, FIAPL, Pensive Architecture व खानवडी ग्रामस्थांचे सहकार्य मिळाल्यामुळे ग्रामीण भागातील मुलांसाठी दर्जेदार शिक्षण उपलब्ध करून देता येणार आहे. ही भागीदारी महाराष्ट्र सरकारच्या 'सर्वांसाठी शिक्षण' या दृष्टीकोनाशी सुसंगत आहे. आम्ही ‘From Classrooms to Life’ या आमच्या तत्त्वज्ञानानुसार, मुलांना केवळ शैक्षणिकच नव्हे तर जीवनातील यशासाठी सज्ज करण्यास कटिबद्ध आहोत.”

- जेसन सी. मॅथ्यू, मुख्य कार्यकारी अधिकारी, क्रिस्टेल हाऊस इंडिया