SPPU RECRUITMENT: 111 पदांच्या भरतीसाठी 6520 अर्ज, केवळ असिस्टंट प्रोफेसर पदासाठी 4836 अर्ज 

एज्युवार्ता न्यूज नेटवर्क 

SPPU RECRUITMENT : सावित्रीबाई फुले पुणे विद्यापीठातील (Savitribai Phule Phule University) विविध विभागांमधील रिक्त 111 प्राध्यापक पदाच्या भरतीसाठी (Recruitment of professor)आता 6 हजार 520 अर्ज प्राप्त झाले आहेत.त्यामुळे प्राध्यापक पदाच्या नोकरीच्या स्पर्धेत आणखी 937 उमेदवारांची भर पडली आहे. विद्यापीठाकडून प्राप्त अर्जांची छाननी झाल्यानंतर मुलाखतीची प्रक्रिया सुरू केली जाणार आहे. त्यास काही कालावधी लागणार आहे.परिणामी विद्यापीठाला नवीन प्राध्यापक मिळण्यासाठी डिसेंबर किंवा जानेवारी महिना उजाडणार असल्याची शक्यता व्यक्त केली जात आहे. 

पुणे विद्यापीठातील 111 रिक्त पदांच्या भरतीसाठी 30 डिसेंबर 2023 रोजी जाहिरात प्रसिद्ध करण्यात आली होती. त्यानुसार दिलेल्या मुदतीत 5 हजार 583 उमेदवारांनी अर्ज दाखल केले होते. मात्र, राज्य शासनाने मराठा आरक्षण लागू केल्यामुळे विद्यापीठाला आरक्षण बदलून नव्याने जाहिरात प्रसिद्ध करावी लागली. राज्य शासनाकडून मान्यता घेऊन विद्यापीठाने 23 सप्टेंबर 2024 रोजी नव्याने जाहिरात प्रसिद्ध केली. ज्या उमेदवारांनी पूर्वी अर्ज केले होते, त्यांना पुन्हा अर्ज करण्याची आवश्यकता नव्हती. मात्र मराठा आरक्षणाचा लाभ घेऊ इच्छिणाऱ्या उमेदवारांना अर्जात दुरुस्ती करण्याची संधी देण्यात आली. त्याचप्रमाणे पूर्वी अर्ज करू न शकलेल्या काही उमेदवारांनी अर्ज केले. त्यामुळे एकूण अर्जांची संख्या आता 6 हजार 520 एवढी झाली आहे. 

विद्यापीठाकडे प्राप्त झालेल्या एकूण 6520 अर्जांपैकी प्रोफेसर पदासाठी 603, असोसिएट प्रोफेसर पदासाठी 1081 तर असिस्टंट प्रोफेसर पदासाठी 4836 अर्ज प्राप्त झाले आहेत. सर्वाधिक अर्ज असिस्टंट प्रोफेसर पदासाठी प्राप्त झाले आहेत. त्यामुळे या पदांच्या भरतीसाठी मोठी स्पर्धा पाहायला मिळणार आहे.